Goa Crime: गोळजुवे, खोर्जुवे-हळदोणा येथे प्रणव फडते (२३) याच्यावर प्राणघातक हल्ला केल्‍याप्रकरणातील संशयितांना आज म्हापसा न्यायालयाने सहा दिवसांची पोलिस कोठडी सुनावली आहे. हल्‍ल्‍यासाठी संशयितांनी वापरलेली सुरी पोलिसांना अजून मिळालेली नाही.

मात्र संशयित ज्या कारगाडीतून हल्ला करण्यासाठी आले होते, ती गाडी पोलिसांनी जप्त केली आहे. दिगंत नाईक (२४, पिलार-तिसवाडी) व उस्मान खान (२९, आगशी-तिसवाडी) अशी संशयितांची नावे आहेत. ही घटना दि. १४ फेब्रुवारी रात्री उशिरा घडली होती. पाच दिवस संशयित फरार होते. त्यांना म्हापसा पोलिसांनी काल सोमवारी मोठ्या शिताफीने अटक केली.

दोन वर्षांपूर्वीचा काढला वचपा

दोन वर्षांपूर्वी ‘सनबर्न’ महोत्सवावेळी प्रणव फडते याने दिगंत नाईक याला मारहाण केली होती. गेल्या १५ फेब्रुवारी रोजी घटनेच्या दिवशी रात्री संशयित आरोपी खोर्जुवे येथे आले होते. तेव्हा ते रस्ता चुकले. वाटेत रस्त्याने चालणाऱ्या युवकाला त्यांनी गाडी थांबवून वाट विचारली. तेव्हा संशयित दिगंत याने प्रणव फ़डतेला ओळखले व गाडीतून उतरून त्यास जाब विचारला. त्‍यानंतर चॉपरने हल्ला चढविला.