Goa Covid Update: काही दिवसांमागे गोव्यात ओमिक्रॉनचा पहिला रुग्ण आढळला होता. तो ओमिक्रॉन (Omicron) रुग्ण आता बराही झाला असल्यामुळे नगरिकांमध्ये आशेचा किरण निर्माण झाला होता. पण नवीन वर्षाच्या स्वागतासाठी (New Year Celebration) झालेल्या पार्टी, माजमस्ती आणि पर्यटकांच्या गर्दीमुळे पुन्हा कोरोना (Corona) रुग्णसंख्येत वाढ होण्याची भीती तज्ज्ञांनी व्यक्त केली होती.

नुकत्याच मिळालेल्या माहितीनुसार गोव्यात कोरोना बाधितांच्या रुग्णसंख्येत वाढ होताना दिसत आहे. त्यातच मुंबईतून गोव्यात कॉर्डेलिया बोटीतून आलेल्या 2000 प्रवाशांपैकी अनेकजण कोरोनाबाधित असल्याची माहिती समोर येत आहेत. बोटीतील प्रवाशांची चाचणी करून मगच त्यांना गोव्यात सोडण्याचे आदेश गोवा सरकारने (Goa Government) बोट व्यवस्थापनाला दिले आहेत. यामुळे अजूनही गोमंतकीयांवर कोरोनाची टांगती तलवार कायम आहे. याबाबत पुढील काय अधिकृत माहिती सामोर येते, याकडे आता सगळ्यांचे लक्ष लागले आहे.