Pernem News : मी एक भाजपचा सच्चा कार्यकर्ता आहे. पेडणे माझी कर्मभूमी आहे. त्यामुळे मी पुढील निवडणुक पेडणे मतदारसंघातूनच लढवीणार असल्याचा पुनुरुच्चार पेडण्याचे माजी आमदार बाबू आजगावकर यांनी केला.

मी पेडण्याचा विकास केला आहे. मी चांगले कर्म केलेले आहे त्याचे फळ मला मिळणारच असेही यावेळी आजगावकर यांनी सांगितले.

बाबू आजगावकर म्हणाले, "मी भाजपचा कट्टर, प्रामाणिक कार्यकर्ता आहे. पेडणे माझी कर्मभूमी आहे. पक्षाने मला तिकीट दिले नाही तरी 2027ची विधानसभा निवडणूक पेडणे मतदारसंघातूनच लढवणार आहे. पक्षाने याबाबतचा निर्णय घ्यावा. पेडणे मतदारसंघात आजच्या घडीला सुरु असलेली कामे आणि माझ्या कार्यकाळातील कामे यामधील फरक तेथील स्थानिकच सांगू शकतात."

"पेडणे तालुक्यात विमानतळ व्हावे यासाठी पंधरा वर्षे दिवस रात्र मेहनत केली. विमानतळ, आयुष हॉस्पिटलची जागा मी मिळवून दिली. आमच्या लोकांना तिथे रोजगार मिळावा यासाठी हे प्रकल्प मी पेडणे मतदारसंघात आणले. प्रकल्पासाठी ज्या लोकांच्या जमिनी गेल्या आहेत त्यांच्या मुलांना रोजगाराच्या संधी द्याव्यात अशी मागणी मी मुख्यमंत्र्यांकडे करणार असल्याचे त्यांनी यावेळी सांगितले.

पेडणे मतदारसंघात वीज, पाणी, रस्ते अशा समस्या होत्या. या समस्या मी मार्गी लावल्याने तेथे विकास झाला. बिनबुडाचे आरोप माझ्यावर करु नयेत. मी मेहनत घेतली आहे. मी तेथे चांगले कर्म केलेले आहे त्याचे फळ मला मिळणारच असा विश्वास यावेळी बाबू आजगावकर यांनी व्यक्त केला.