Mankurad Mango : राज्याच्‍या बाजारपेठांमध्ये मानकुराद आब्यांचे आगमन होऊन महिना होत आला, परंतु अजूनही तो भाव खातच आहे. 5 हजार रुपये प्रतिडझन दराने तो विकला जातोय. मानकुराद आंब्यासोबतच हापूस आंबाही दाखल झाला असून 2 हजार रुपये प्रतिडझन दराने तो विकला जातोय.

सर्वसामान्य नागरिकांना एवढी रक्कम देऊन आंब्याची चव चाखणे शक्य नसल्याने किमतीत घट होण्याची वाट पाहिली जात आहे. पुढील महिन्यात मोठ्या प्रमाणात आंब्‍याचे उत्पादन वाढेल, त्यावेळी सर्वांना परवडण्यायोग्य दर होईल, असे विक्रेते सांगतात.

पिकलेल्या मानकुराद आंब्यांचे उत्पादन कमी असले तरी मोठ्या प्रमाणात कच्च्या कैऱ्या बाजारात दाखल होत आहेत. आकाराप्रमाणे दरात चढउतार आहे.

उकाड्यामुळे फळांना मागणी

राज्यात उकाडा वाढल्याने अनेक ग्राहक मोठ्या प्रमाणात कलिंगड, मोसंबी, सफरचंद, द्राक्षे तसेच इतर रसदार फळे खरेदी करताना दिसत आहेत. त्यामुळे फळांना मोठ्या प्रमाणात मागणी वाढली आहे. कलिंगडाला इतर फळांच्या तुलनेत अधिक मागणी असल्याचे विक्रेते सांगतात.

10 रुपयांना 2 लिंबे

उष्म्यामुळे लिंबूची विक्री वाढली आहे. अनेक लोक लिंबू सरबत, लिंबू सोडा तसेच ‘क’ जीवनसत्वासाठी लिंबूचा वापर जेवणात वाढला आहे. चांगले मोठ्या आकाराचे लिंबू 10 रूपयांना दोन तर लहान 20 रुपयांना 5 नग असे विकले जात आहेत.