पणजी: येत्या विधानसभा निवडणुकीत भले मुख्यमंत्री डॉ. प्रमोद सावंत यांनी भाजपचाच उमेदवार असेल, असे जाहीर केले असले तरी मगोपने त्या मतदारसंघावरील दावा न सोडण्याचे ठरविले आहे. राज्याचे पहिले मुख्यमंत्री स्व. भाऊसाहेब बांदोडकर यांच्यापासून मगोपचा बालेकिल्ला असलेला हा मतदारसंघ का सोडावा, असा विचार मगोपमध्ये सुरू झाला आहे.

याबाबत मगोपचे अध्यक्ष दीपक ढवळीकर यांना विचारले असता ते म्हणाले, की मगोपची भाजपशी युती होईल, असे ठरले आहे. सध्या मांद्रेत मगोपचा आमदार आहे. २०२७ च्या निवडणुकीला अद्याप अवकाश आहे. युतीसाठी बोलणी निवडणूक जवळ आल्यावर होतील. त्यामुळे आताच आम्ही मांद्रे मतदारसंघ सोडणार, असा अर्थ का काढला जावा. कदाचित पेडणे मतदारसंघही आम्हाला मिळेल, असे आम्ही आताच का म्हणावे.

भाजपच्या मंडळ पातळीवरील कार्यकर्ता मेळाव्यात प्रदेशाध्यक्ष दामू नाईक आणि माजी आमदार दयानंद सोपटे यांच्या उपस्थितीत मांद्रेत येत्या निवडणुकीत भाजपचाच आमदार असेल, अशी घोषणा केली आहे. याचा अर्थ भाजपचा उमेदवार मांद्रेत असेल, असा होतो. मागील विधानसभा निवडणुकीत मगोपचे जीत आरोलकर, भाजपचे दयानंद सोपटे आणि अपक्ष लक्ष्मीकांत पार्सेकर अशी तिरंगी लढत झाली होती.

त्यात भाजपच्या मतांची फाटाफूट झाली आणि आरोलकर विजयी झाले. मध्यंतरी आरोलकर हेच भाजपचे पुढील निवडणुकीतील उमेदवार असतील, अशी चर्चा होती. ती चर्चा अद्याप कोणीही जाहीरपणे नाकारलेली नाही. त्यामुळे भाजपचा आमदार कोण, हा विषय स्थानिक पातळीवर चर्चेचा ठरला आहे.

युतीच्या चर्चेवेळी मतदारसंघ ठरवू!

ढवळीकर यांनी सांगितले, की युतीची बोलणी होईल, त्यावेळी प्रत्येक मतदारसंघावर चर्चा होईल. सर्वसाधारणपणे ज्या पक्षाचे जेथे आमदार आहेत, तो मतदारसंघ त्या पक्षाने लढवायचा असे ठरून गेलेले असते. राज्यात परंपरागतरित्या मगोपचे अनेक मतदारसंघ आहेत. त्यासाठी मगोप आग्रही असतो. त्यात निश्चितच मांद्रेचा समावेश होतो.