पणजी: मंदार सुर्लकर (Mandar Surlakar) खूनप्रकरणी (Murder Case) जन्मठेपेची शिक्षा झालेल्या चार आरोपींनी त्यांच्या मुदतपूर्व सुटकेसाठी मुंबई उच्च न्यायालयाच्या गोवा खंडपीठात (Goa Court) सादर केलेल्या याचिका दाखल करून घेतल्या आहेत. त्यावरील सुनावणी नोव्हेंबर 2021 पर्यत तहकूब करण्यात आली आहे.

आरोपी रोहन धुंगट, जोवितो रायन पिंटो, शेख नफियाझ व शंकर तिवारी याना खुनाच्या आरोपाखाली जन्मठेपेची शिक्षा झाली आहे. हे सर्वजन 2005 पासून कोलवाळ कारागृहात शिक्षा भोगत आहेत. राज्य शिक्षा आढावा मंडळाच्या झालेल्या बैठकीत या चौघांना शिक्षेतून मुदतपूर्व सुटका करण्यासंदर्भातची शिफारस केली होती. ही शिफारस बाल न्यायालयाकडे पाठवण्यात आली होती. बाल न्यायालयाने त्यांची मुदतपूर्व सुटका करण्यास हरकत घेतली होती. या प्रकरणातील साक्षीदारांना आरोपींकडून धोका संभवू शकतो असे निरीक्षण केले होते. त्यामुळे या चौघांनीही वेगवेगळ्या याचिकांद्वारे उच्च न्यायालयात त्याला आव्हान दिले होते.

उच्च न्यायालयासमोर असलेल्या या याचिकांमध्ये मृत मंदार सुर्लकर यांचे वडील दिपक सुर्लकर यांनी हस्तक्षेप अर्ज सादर केला आहे. चारही आरोपींना मुदतपूर्व सुटका करण्यास विरोध केला आहे. राज्य सरकारच्या शिक्षा आढावा मंडळाने शिफारस केल्यानंतर हे प्रकरण फौजदारी दंड संहितेच्या कलम 433 खाली येते. त्यामुळे हे प्रकरण ज्या न्यायालयाने त्यांना शिक्षा दिली त्याच्याकडे पाठवण्याचा प्रश्‍नच येत नाही. त्यामुळे कलम 432 खाली प्रक्रियेची गरज नाही, असा युक्तिवाद याचिकादारांच्या वकिलानी केला. या याचिका दाखल करून घेऊन त्या अंतिम सुनावणीसाठी नोव्हेंबरमध्ये ठेवल्या आहेत.