Malaria : मलेरिया निर्मूलनात गोवा अग्रेसर असून मलेरियाचे रुग्णांची संख्या शून्य आहे. मलेरियाचा संसर्ग मूल्यांकन मोजमाप करणारा निर्देशांक एपीआय तपासल्यास उत्तर गोवा -.0.03 आणि दक्षिण गोवा शून्य आहे.

तसेच राज्यातील 34 आरोग्य केंद्रांपैकी 32 मलेरिया मुक्त आहेत, अशी माहिती राष्ट्रीय संसर्गजन्य आजार उपक्रमाच्या गोव्यातील मुख्य अधिकारी डॉ. कल्पना महात्मे यांनी दिली.

डेंग्यूच्या तुलनेत राज्यात मलेरिया नियंत्रणात असून शेजारच्या राज्यातून येणाऱ्या मजुरांवर लक्ष ठेवले जात आहे, कारण संसर्ग येथून होण्याची शक्यता आहे. बांधकामाच्या ठिकाणी देखील मलेरिया संसर्गासाठी तपासणी केली जात आहे, अशा डॉ. महात्मे म्हणाल्या.

गेल्या वर्षी चिकूनगुनियाचे रुग्ण मोठ्या प्रमाणात सासष्टीत आढळले होते. कर्नाटकातून आलेल्या व्यक्तीमुळे आजार मोती डोंगर येथे संसर्ग झाला होता. त्यामुळे यंदा आरोग्य खात्याकडून पाहणी वाढवण्यात आली आहे. सध्या जानेवारीमध्ये एकही रुग्ण आढळलेला नाही, असेही त्यांनी सांगितले.