मडगाव: महाराष्ट्रातील पर्यटकाची कार कोलवा येथून चोरलेल्या चोरट्याचा अजून थांगपत्ता लागू शकलेला नाही. चोरीला गेलेली कार कर्नाटक राज्यात सापडली असली, तरी संशयित अजूनही पोलिसांना गुंगारा देत आहे.

त्याला शोधण्यासाठी पोलिसांनी आपले प्रयत्न चालू ठेवले असून कर्नाटक पोलिसांना त्याची माहिती दिली आहे. २८ मे रोजी कोलवा येथील एका रिसॉर्टमध्ये उतरलेल्या ठाणे-महाराष्ट्र येथील संजय तेराडे यांच्या मालकीची मारुती एर्टिगो कार त्याच रिसॉर्टमध्ये सुरक्षा रक्षक म्हणून काम करत असलेला प्रशांत एन. याने धुवून देतो असे सांगून ती घेऊन पोबारा केला होता.

याप्रकरणी नंतर तेराडे यांनी कोलवा पोलिस ठाण्यात तक्रार केली होती. मागाहून पोलिसांनी या प्रकरणी तपास सुरू करून चोरीला गेलेली कार कर्नाटकात जप्त केली होती.

संशयिताने एका दुभाजकाला धडक देऊन कार सोडून  पळ काढला होता. संशयित मूळ कर्नाटकातील शिमोगा येथील आहे. सध्या त्याचा शोध चालू असल्याची माहिती कोलवा पोलिसांनी दिली.