Mahadayi Water Dispute: म्हादईचे पाणी मलप्रभेत वळविणे आणि गोव्यात कोळसा हाताळणीत वाढ करणे या दोन्ही प्रकरणांचा एकमेकांशी थेट संबंध आहे. जिंदाल,अदानीसारख्या पुंजीपतींचा फायदा होणे हाच त्यामागचा खरा हेतू आहे, असा आरोप काल येथे पर्यावरणप्रेमी, आंदोलकांनी घेतलेल्या बैठकीत केला.

या दोन्ही प्रकरणांवर ग्रामपातळीवर जाऊन लोकजागृती करण्याचा निर्णयही घेण्यात आला.

म्हादईचे पाणी वळविलेल्‍या मलप्रभेच्या खोऱ्यातच वरील कंपन्यांचे पोलाद कारखाने उभे होत आहेत. हे वाढीव पाणी याच कारखान्यांसाठी वापरले जाणार आहे, असा आरोप अभिजित प्रभुदेसाई यांनी केला.

30 रोजी ठरणार आंदोलनाची दिशा

26 जानेवारी रोजी गावागावांत होणाऱ्या खास ग्रामसभांमधून दोन्ही प्रस्तावांना विरोध करण्याचा ठराव घेण्यात येईल. तसेच 30 रोजी मुरगाव बंदराबाहेर कार्यकर्ते निदर्शने करतील, असे कोळसाविरोधी आंदोलनातील नेते अभिजित प्रभुदेसाई म्‍हणाले.

याच दिवशी सायंकाळी मडगाव येथील कोकणी भवनमध्ये ‘म्हादई बचाव’ मंचची एक बैठक होणार आहे. यावेळी आंदोलनाची पुढील दिशा ठरविली जाईल, असेही त्‍यांनी सांगितले.