Mahadayi Water Dispute: ''म्हादई''चे पाणी दिवसेंदिवस तापत आहे. कर्नाटक सरकारच्या नियोजित ''कळसा-भांडुरा'' प्रकल्पाच्या सुधारीत अहवालास (डीपीआर) केंद्र सरकारने मान्यता दिल्यानंतर राज्यात एकच खळबळ माजली आहे.

''म्हादई'' वळविण्यास राज्यभरातून विरोध वाढू लागला आहे. या प्रश्‍नावर गोवा आणि कर्नाटक सरकारने 'सुवर्णमध्य' काढून हा गुंता सामंज्यसपणे सोडवावा. म्हादईवर गोव्याचा हक्क आहे, नैसर्गिकस्रोत जल प्रवाह उलट्या दिशेने वळविणे चुकीचे आहे, असे मत अखिल गोवा कन्नड महासंघातर्फे हनुमंतप्पा रेड्डी यांनी व्यक्त केले.

पाच लाख कन्नड लोक

कन्नड महासंघाकडून मिळालेल्या माहितीनुसार नोकरीधंद्यानिमित्त गोव्यात वास्तव्य करणाऱ्या कन्नडिगांची संख्या किमान पाच लाख असण्याची शक्यता आहे. डिचोलीत जवळपास 15 हजार कन्नड लोक वास्तव्य करुन आहेत.

''कर्मभूमी कन्नड संघ'' या नावाची संघटनाही गोव्यात कार्यरत आहे.. कर्नाटक सरकारच्या सहकार्याने गेल्या काही वर्षांपासून दरवर्षी डिचोलीत कन्नड संस्कृती महोत्सवही आयोजित करण्यात येत आहे. या महोत्सवाच्या माध्यमातून कन्नडीगांचे शक्तीप्रदर्शनही दिसून येत असते. मात्र म्हादईप्रश्नी कन्नडिग स्पष्ट भूमिका मांडत नाहीत.

गोव्यात वास्तव्य करुन असलेल्या कन्नडिगांची जन्मभूमी कर्नाटक असली, तरी गोवा कर्मभूमी आहे. कन्नडिगांचे गोमंतकीयांशी चांगले संबंध आहेत. गोमंतकीयांप्रमाणेच गोव्यात वास्तव्य करून असलेल्या कन्नडिगांनाही पाण्याची तेवढीच गरज आहे.

भविष्यात पाण्याअभावी कोणाचाही घसा कोरडा पडता कामा नये. गोवा आणि कर्नाटक राज्याने ''म्हादई''चा गुंता सामंजस्याने सोडवावा. - हनुमंतप्पा रेड्डी, अध्यक्ष, कन्नड महासंघ.