कुर्टी - खांडेपार पंचायतीच्या ग्रामसभेत म्हादईचे पाणी कर्नाटकात वळवण्यासाठी केंद्र सरकारने घेतलेल्या पुढाकाराबद्दल ग्रामस्थांनी तीव्र संताप व्यक्त करून केंद्रीय गृहमंत्री अमित शहा यांचा निषेध केला. गोवा सरकारच्या हलगर्जीपणामुळेच केंद्र सरकारने कर्नाटकला ही संधी दिल्याचा आरोपही यावेळी करण्यात आला.

खांडेपार येथील चर्च सभागृहात आज (रविवारी) झालेल्या या ग्रामसभेला सरपंच नावेद तहसीलदार तसेच उपसरपंच व इतर पंचसदस्य उपस्थित होते. प्रारंभी पंचायत सचिवाने मागील ग्रामसभेचा अहवाल सादर केला.

पंचायतक्षेत्रातील मुख्य रस्त्यांवर बेकायदा गाडे थाटण्यात आले असून हे गाडे हटवण्यासाठी पंचायतीने काय कारवाई केली, असा सवाल उपस्थित केल्यानंतर राष्ट्रीय महामार्ग प्राधिकरणाकडे हा विषय येत असल्याने त्यांना पत्रही पाठवल्याचे सांगण्यात आले. मात्र, संबंधित खात्याने कारवाई केली नसल्याचे सांगण्यात आले.

ग्रामसभेत स्मशानभूमी, रस्ते, पथदीप तसेच गटारे आदी विषयांवरही चर्चा झाली. स्वागत सरपंच नावेद तहसीलदार यांनी केले. नीळकंठ नाईक यांनी आभार मानले.