Mahadayi Water Issue: म्हादईचे पाणी वळवण्याबाबत कर्नाटक सरकारकडून न्यायालयाच्या आदेशांचे उल्लंघन करत दादागिरी सुरूच आहे.

या विषयावरून गोव्यात आगडोंब उसळलेला असतानाच मुख्यमंत्री डॉ. प्रमोद सावंत यांनी कर्नाटकात भाजपचा जाहीरपणे प्रचार करत विद्यमान भाजप सरकार पुन्हा सत्तेवर आले पाहिजे, असे सांगितले.

डबल इंजिन सरकारच कर्नाटकचा विकास करेल, असे सांगायलाही ते विसरले नाहीत. यावरून गोव्यात विरोधकांनी त्यांच्यावर सडकून टीका केली आहे.

मुख्यमंत्र्यांना राज्यहितापेक्षा पक्षनिष्ठा महत्त्वाची वाटल्याचा आरोप काँग्रेसचे विरोधी पक्षनेते युरी आलेमाव यांनी केला आहे. याच प्रश्‍नावरून आप आणि गोवा फॉरवर्ड पक्षाने मुख्यमंत्री सावंत यांच्या प्रचारनीतीवर आक्षेप नोंदवला आहे.

भाजपने गोमंतकीयांच्या जखमेवर चोळले मीठ

कर्नाटकात अखेरच्या घटका मोजत असलेल्या भाजप सरकारला मुख्यमंत्र्यांनी प्राणवायू देण्याचा अयशस्वी प्रयत्न केला आहे. म्हादईला आपली आई म्हणणाऱ्या मुख्यमंत्र्यांनी म्हादईचे पाणी वळवू देणार नाही, अशी गर्जना करण्याचे धाडस तेथे दाखविणे गरजेचे होते.

मात्र, त्यांच्याकडून ते झाले नाही. उलट गोमंतकीयांच्या जखमेवर मीठ चोळण्याचे काम सावंत यांनी केले आहे, अशी तिखट प्रतिक्रिया आलेमाव यांनी व्यक्त केली.

कर्नाटकच्या अडेलतट्टू भूमिकेचा निषेध

युरी आलेमाव म्हणाले की, म्हादईचे पाणी वळवण्याबाबत कर्नाटक सरकारकडून दादागिरी सुरू आहे. कर्नाटकच्या या अडेलतट्टू भूमिकेबद्दल गोमंतकीयांमध्ये असंतोष उसळला असून ‘सेव्ह म्हादई’ चळवळीमार्फत लढा उभारला जात आहे.

असे असताना, मुख्यमंत्री डॉ. सावंत मात्र कर्नाटकात जाऊन विद्यमान भाजप सरकारच पुन्हा सत्तेवर आले पाहिजे, असे सांगत आहेत. त्यांना भाजपनिष्ठा जास्त महत्त्वाची वाटते, हे स्पष्ट होते.

‘त्या’ विषयाचा सोक्षमोक्ष लावाच

गोवा फॉरवर्ड पक्षाचे नेते आमदार विजय सरदेसाई म्हणाले की, मुख्यमंत्र्यांना बोलावून यासंबंधीची खरी माहिती सांगावी.

कारण केंद्रीय नेते आणि कर्नाटकच्या मुख्यमंत्र्यांसमवेत त्यांनी बैठक घेतल्याचे शहा यांनी सांगितले. या विषयाचा सोक्षमोक्ष लागलाच पाहिजे. यासाठीच आम्ही तशी मागणी केली आहे.

मुख्यमंत्री डॉ. सावंत यांनी म्हादई नदी वाचवण्यासाठी प्रयत्न करणे गरजेचे आहे. यासाठी म्हादईचे पाणी वळवू देणार नाही, असे कर्नाटकला ठामपणे सांगणे गरजेचे असताना तिथल्या सत्ताधारी भाजपसाठी राज्याच्या विरोधात जाऊन प्रचार करणे, हे गोमंतकीयांचा स्वाभिमान गहाण टाकण्यासारखे आहे. - ॲड. अमित पालेकर, आप.

शहांनंतर सावंत कर्नाटकात म्हादईप्रश्‍नी वक्तव्य केल्यावर केेंद्रीय गृहमंत्री अमित शहा अडचणीत आले होते.

आता भाजपच्या प्रचार सभेला गेेल्यानंतर मुख्यमंत्री डॉ. प्रमोद सावंत यांनी जाहीर वक्तव्य केल्याने ते अडचणीत आले आहेत.