OM Birla In Goa: सभापती रमेश तवडकर यांच्या संकल्पनेतून साकार झालेल्या राज्यातील अनोख्या श्रम-धाम योजनेतील वीस घरांचे गुरुवारी (ता.15) लोकसभा सभापती ओम बिर्ला यांच्या हस्ते हस्तांतरण करण्यात येणार आहे. यासाठी ओम बिर्ला गोव्यात दाखल झाले आहेत. बिर्ला यांचे सभापती रमेश तवडकर, राजशिष्टाचार मंत्री माविन गुदिन्हो यांनी पुष्पगुच्छ देऊन स्वागत केले.

सभापती रमेश तवडकर यांच्या संकल्पनेतील श्रम-धाम योजना मार्च महिन्यात सुरू झाली होती. आतापर्यंत ज्या रहिवाशांना पक्के छप्पर नाही, अशा वीस कुटुंबांना पक्के घर बांधून देण्यात आले आहे. त्यांना गुरूवारी ओम बिर्ला यांच्या हस्ते हस्तांतरण करण्यात येणार आहे.

गुरुवारी शासकीय उच्च माध्यमिक विद्यालयात संध्याकाळी 04 वाजता आयोजित विशेष कार्यक्रमात बिर्ला यांच्या हस्ते या घरांच्या चाव्या घरमालकांना देण्यात येणार आहेत. या कार्यक्रमाला मुख्यमंत्री डॉ. प्रमोद सावंत व अन्य मंत्री उपस्थित राहतील, असे सभापती रमेश तवडकर यांनी सांगितले.

श्रम-धाम योजना राबविण्यासाठी बलराम चॅरिटेबल ट्रस्टची स्थापना करण्यात आली आहे.

राज्यातील प्रत्येक व्यक्तीने एक रुपया किंवा एक दिवस या उपक्रमासाठी देण्याचे आवाहन सभापती तवडकर यांनी केले होते. त्यानंंतर राज्यभरातून आर्थिक मदत त्याचबरोबर श्रम करण्यासाठी कार्यकर्ते शनिवार, रविवार व सुट्टीच्या दिवसांत काणकोणात राबले.