वाळपई : प्रत्येकाच्या घरांमध्ये प्रकाश आणण्यासाठी वीज कार्यालयाच्या लाइनमनचे योगदान महत्त्वाचे आहे. आपल्या कार्याशी प्रामाणिक राहून प्रत्येक ग्राहकांना समाधानकारक सेवा आपल्यापरीने देताना अनेक समस्यांना तोंड द्यावे लागते. पाऊस असो वा ऊन कसलीही पर्वा न करता वीज कर्मचारी रात्रंदिवस सेवा बजावून दर्जेदार सेवा देण्याचा प्रयत्न करत असतात. मात्र, ग्राहकांना सेवा देताना आपल्या जिवाची काळजी घेत सावधगिरी बाळगणे तितकेच महत्त्वाचे आहे, असे प्रतिपादन डिचोली वीज खात्याचे साहाय्यक अभियंता तुळशीदास पळ यांनी केले.

वाळपई नगरपालिका सभागृहात लाइनमन दिवसानिमित्त आयोजित खास कार्यक्रमात ते प्रमुख पाहुणे म्हणून बोलत होते. यावेळी व्यासपीठावर वाळपई वीज खात्याचे साहाय्यक अभियंता दीपक गावस, कनिष्ठ अभियंता रविश माजीक, अश्वीन नार्वेकर, शुभम गावस, विवेक गावस, साहाय्यक अभियंता ओलिंडा कुतिन्हो, ज्येष्ठ लाईनमन शाणू परवार उपस्थित होते.

तुळशीदास पळ पुढे म्हणाले, की आत्तापर्यंत वीज कार्यालयात संघर्षमय स्थितीत काम करणाऱ्या लाइनमनची कोणीही दखल घेतली नव्हती‌. मात्र, गेल्या वर्षीपासून वीज खात्याच्या माध्यमातून लाइनमनदिन साजरा करून त्यांची सेवा सन्मानित करण्याचे कार्य खरोखरच कौतुकास्पद आहे.

लाइनमनच्या कार्याची योग्य दखल

वाळपईचे साहाय्यक अभियंता दीपक गावस म्हणाले, सत्तरी तालुक्यातील जंगलात जाऊन काम करणे खरोखरच अवघड आहे. मात्र, वीज खात्याचे अधिकारी व कर्मचाऱ्यांनी दिलेल्या चांगल्या सहकार्यामुळे हे शक्य झाले आहे. लाइनमनच्या कार्याची दखल घेण्याचा प्रयत्न खरोखरच कौतुकास्पद आहे.