म्हापसा : पाण्याची समस्या तशी सबंध राज्यभरातच आहे, परंतु शिवोलीसारख्या ग्रामीण भागातील विहिरी स्थानिकांच्या दुर्लक्षामुळे संपूर्णत: बुजल्याने सध्या याभागातील रहिवाशांवर केवळ नळाच्या पाण्यावर विसंबून राहण्याची वेळ आली आहे. दरम्यान, नळाच्या पाण्यानेही मध्येच दडी मारल्यास लोकांची पाण्यासाठी मोठी धावाधाव होत असल्याचे दिसते. तसेच याभागातील विहिरींची दुरुस्ती व्हावी, यासाठी स्थानिक रहिवाशांनी आता पंचायत तसेच जलस्त्रोत खात्याची मनधरणी केली आहे. (water problem in Siolim News Updates)

एकट्या शिवोलीतच दहा ते पंधरा जुन्या विहिरी बुजलेल्या असून यापैकी बहुतेक विहिरी खासगी मालकीच्या आहेत. मार्ना शिवोलीच्या (Siolim) आठवडी बाजारात असलेली एकमेव सार्वजनिक विहीर ही 130 वर्षे जुनी विहीर असून स्थानिक चर्च मालमत्ते(फाब्रिका )च्या अखत्यारीत आहे. गेली दहा वर्षे येथील विहिरीकडे संबंधितांचे दुर्लक्ष झाल्याने ही विहीर सध्या डागडुजीच्या प्रतीक्षेत आहे. मार्नाच्या आठवडी बाजारात मध्यभागी असलेल्या या विहिरीमुळे परिसरात रात्रीच्या वेळी मद्यप्राशन करुन फिरणाऱ्या मद्यपींच्या तसेच मोकाट गुरांच्या जीवाला धोका आहे.

दरम्यान, या विहिरीची तात्काळ दुरुस्ती व्हावी, यासाठी स्थानिक बाजारकर मंडळाकडून अनेकदा स्थानिक पंचायतीला मागणी करण्यात आले. परंतु फाब्रिकाचा ना हरकत दाखला जोपर्यंत मिळत नाही, तोपर्यंत येथील विहिरीची दुरुस्ती शक्य नसल्याचे पंचायत मंडळाने सांगितल्याची माहिती येथील व्यावसायिकांनी दिली आहे.

दरवर्षी पाण्यासाठी (Water) वणवण करणाऱ्या येथील लोकांना सध्या नळाच्या अनियमितपणे होणाऱ्या पाणी पुरवठ्यावर विसंबून राहावे लागते. यामुळे होणारी गैरसोय टाळण्यासाठी या भागातील ग्रामस्थांना पाण्यासाठी अनेकदा मोर्चे तसेच आंदोलने (Protest) करणे भाग पडल्याचे स्थानिकांचं म्हणणं आहे. पंचक्रोशीतील बुजलेल्या विहिरी दुरुस्त केल्यास भविष्यात नळाच्या पाण्यावर अवलंबून राहण्याची वेळ येणार नाही. ही बाब आपण पंचायत मंडळाच्या वतीने सरकार दरबारी कळवणार असल्याचं पंचायत सदस्यांनी सांगितलं आहे.