फोंडा : फोंड्यात गेले दोन दिवस कोसळत असलेल्या संततधारेमुळे लोकांची धांदल उडाली. अवकाळी पावसाच्या दणक्याने तालुक्यातील जनजीवन विस्कळीत झाले असून, काल गुरुवार व आज शुक्रवारी दोन दिवस संततधार पावसामुळे काही ठिकाणी झाडे कोसळली. त्यात बेतोडा येथील प्रमोद गावकर यांच्या घराच्या एका बाजूला माड पडून सुमारे 30 हजार रुपयांचे नुकसान झाले.

फोंड्यातील बेतोडा, निरंकाल, उसगाव, बोरी, प्रियोळ, खांडेपार व इतर ठिकाणी रस्त्यांवर झाडे कोसळली. फोंडा तसेच कुंडई अग्निशामक दल व स्थानिकांनी रस्त्यावरील झाडे हटवली. संततधार पावसामुळे शेतजमिनी तसेच नाले पाण्याने भरले.

मे महिना असल्याने काही लोकांनी घरे शाकारणीसाठी घेतली होती, मात्र संततधार कोसळत असल्याने घरे शाकारणीच्या कामात अडथळे आले. शुक्रवारी तर फोंडा तालुक्यातील अनेक मंडपांत लग्न सोहळे होते. पावसाने या सोहळ्यांवर विरजण टाकले. लग्नमंडप पावसामुळे भिजून गेल्याने वरातींची अडचण झाली.

काही ठिकाणी जोरदार वारे तर काही ठिकाणी विजांचा कडकडाट असा प्रकार रात्रीच्यावेळी दिसला. त्याशिवाय फोंडा तालुक्यात वारंवार खंडित होत असलेल्या वीजपुरवठ्यामळे लोकांची गैरसोय झाली.

फोंडा शहरात दोन तास वीज गूल

फोंडा शहर परिसरात सकाळी दोन तास वीज गूल झाली. फोंड्यातील शहर परिसरातील मुख्य भागात सारस्वत बँकेजवळील वीजवाहिन्या लोंबकळू लागल्याने धोका निर्माण झाल्याने वीजपुरवठा खंडित करण्यात आला. त्यानंतर वीज खात्याच्या कर्मचाऱ्यांनी या लोंबकळणाऱ्या वीजवाहिन्या ओढल्या तरी एका बाजूला कलंडलेला वीज खांब धोकादायक स्थितीत आहे. लोंबकळणाऱ्या वीजवाहिन्या पुन्हा ओढण्यासाठी शहर परिसरातील वीजपुरवठा खंडित करण्यात आला, तो तब्बल दोन तासांनी सुरळीत झाला. दरम्यान, फोंडा तालुक्यात अधूनमधून वीजपुरवठा खंडित होण्याचे प्रकार सुरूच असून रात्रीच्यावेळी वीज गायब होत असल्याने लोकांची अतिशय गैरसोय होत असते.