गोव्यातील तापमानाचा पारा मागील काही दिवसांपासून चढलेलाच आहे. वाढत्या तापमानामुळे आता शीतपेयांकडे लोकांची पाऊले आपोआप वळत आहेत. लिंबू सरबत, लस्सी, कोल्ड ड्रिंक्स आणि विविध थंड पदार्थ घेण्यावर नागरिक भर देत आहेत. याचा बाजारातील लिंबू, कैऱ्या याच्या मागणीवर देखील प्रभाव दिसून येत आहे.

फोंडा बाजारातील दरानुसार, चार लिंबू वीस रूपयांना मिळत असून, पाच कैऱ्यांसाठी पन्नास रूपये मोजावे लागत आहेत.

फोंडा बाजारात भाज्यांचे दर देखील वाढलेलेच दिसून येत आहेत. उकाड्यामुळे काकडी, आले यांची मागणी वाढली आहे. काकडी सध्या चाळीस रूपये किलो दराने विकली जात आहे. तर, आल्याच्या दरात तीस रूपयांनी वाढ झाली असून, त्याची 130 रूपये किलो दराने विक्री होत आहे. याशिवाय मिरचीचा दर देखील वाढला असून, त्याची सध्या 80 किलो दराने विक्री होत आहे.

कोकणात कच्च्या फणसाची भाजी प्रत्येकाच्या आवडीची आहे. कच्च्या फणसाची सध्या मागणी वाढली असून, त्याची 40 ते 60 रूपये प्रति नग अशी विक्री होत आहे.

काही प्रमुख भाज्यांचे दर

कांदा - वीस रूपये किलो, बटाटा - तीस रूपये किलो, वांगी - चाळीस रूपये किलो, टोमॅटो - चाळीस रूपये किलो, भेंडी - साठ रूपये किलो, कोबी / फ्लॉवर - वीस ते पंचवीस रूपये प्रति नग, कोथिंबीर - पंधरा रूपये जुडी, मेथी आणि शेपू - दहा रूपये जुडी, कच्चा फणस - पन्नास ते ऐंशी रूपये नग अशी विक्री होत आहे.