मडगाव: घोगळ येथील दत्तमंदिरा जवळ जलवाहिनीला जोडणी देण्याचे काम सुरू असताना अचानक पाईप विस्कळीत होऊन वाहिनीला गळती लागून लाखो लिटर पाणी वाया गेले. यामुळे येथील ओहोळाच्या जागेला ऐन उन्हाळ्यात तळ्याचे स्वरूप प्राप्त झाले. ही घटना आज (गुरुवारी) दुपारी अडीजच्या सुमारास घडली.

याबाबत माहिती अशी की, घोगळ येथे जलवाहिनीला जोडणी देण्याचे काम सुरू असताना जोरदार प्रवाहासह हे पाणी बाहेर पडले. सुमारे पाऊण तास हे पाणी वाहत होते.

यासंबंधी पाणी खात्याचे अभियंता निखिल खार्की यांना विचारले असता, जोडणी देण्यासाठी पाईपमध्ये असलेले पाणी बाहेर काढणे आवश्यक होते. त्यामुळे हा प्रकार घडला असे त्यांनी सांगितले. काही दिवसांपूर्वी पॉवर हाऊस जवळ असाच प्रकार घडला होता.