केपे: भाजप सरकारच्या अपयशामुळे कुडचडे शहर गोव्याची ‘ड्रग कॅपिटल’ बनत असल्याचा गंभीर आरोप गोवा प्रदेश काँग्रेसचे माजी अध्यक्ष अमित पाटकर यांनी केला. शैक्षणिक संस्थांमधील व्यवस्थापन, प्राचार्य व संबंधित अधिकाऱ्यांशी संवाद साधून विद्यार्थ्यांच्या सुरक्षिततेबाबतच्या समस्या जाणून घेतल्यानंतर त्यांनी ही चिंता व्यक्त केली.

तरुणांमध्ये अमली पदार्थांचा वाढता धोका रोखण्यासाठी प्रतिबंध, जनजागृती, सतर्कता आणि प्रभावी अंमलबजावणीची गरज असल्याचे पाटकर यांनी सांगितले. काही विद्यार्थी अमली पदार्थांच्या आहारी गेले असल्याने त्यांचे पालक भीतीच्या छायेखाली जगत असल्याचे त्यांनी सांगितले. अमली पदार्थांविरोधात कडक मोहीम राबविण्याची वेळ आली असून, केवळ अधूनमधून छापे टाकून किंवा प्रसिद्धी मोहिमा राबवून हा प्रश्न सुटणार नाही, असेही त्यांनी स्पष्ट केले.

भाजप सरकार राज्यात सत्तेवर आल्यापासून अमली पदार्थांचा व्यवसाय फोफावला असल्याचे त्यांनी सांगितले. ‘रस्ते आणि इमारती म्हणजेच विकास नव्हे. मुलांच्या भवितव्यावर अमली पदार्थांचे सावट असेल, तर विकासाचा अर्थ काय?’ असा सवाल करत सरकारने अमली पदार्थांविरोधात निर्णायक कारवाई करावी, अशी मागणी पाटकर यांनी केली.

ऑक्टोबरपासून जनजागृती मोहीम

येत्या ऑक्टोबरपासून कुडचडे परिसरात शाळा, विद्यार्थी, शिक्षक, पालक आणि नागरिकांच्या सहभागातून सातत्यपूर्ण अमली पदार्थविरोधी जनजागृती मोहीम सुरू करण्याची घोषणा पाटकर यांनी केली. त्यानंतर ही मोहीम संपूर्ण गोव्यात राबविण्याचा त्यांचा मानस आहे.