Kolhapur Vaibhavwadi Konkan Railway Route

तत्कालीन रेल्वेमंत्री सुरेश प्रभू यांच्या काळात मंजूरी देण्यात आलेला कोल्हापूर -वैभववाडी रेल्वे मार्ग अद्याप कागदावरच आहे. 107 किमी या मार्गाचे दोनवेळा सर्व्हक्षण झाले मात्र, त्यावर पुढे कोणतीच कार्यवाही झाली नाही.

दरम्यान, गोव्यात बुधवारी कोकण रेल्वे कॉर्पोरेशन समितीची बैठक होणार असून यात कोल्हापूर -वैभववाडी रेल्वे मार्गाचा विषय अजेंड्यावर आहे. या बैठकीत या मार्गाचा विषय निकालात निघणार का? याकडे सर्वांचे लक्ष लागले आहे.

कोल्हापूर-वैभववाडी रेल्वे मार्गाचे दोनवेळा सर्व्हक्षण पार पडले, दरम्यान या मार्गात अनेक ठिकाणी चढउतार असल्याने यातील 27 किमीचे फेरसर्व्हक्षण केले जाणार आहे. सर्व्हक्षण झाल्यानंतर कामाची निविदा काढली जाईल असे मध्य रेल्वेच्या वतीने यापूर्वी स्पष्ट करण्यात आले होते.

त्यानंतर याबाबत पुढे काहीच कार्यवाही झाली नसल्याने, बुधवारी होणाऱ्या बैठकीत कोल्हापूर-वैभववाडी रेल्वे मार्गाबाबत प्रामुख्याने चर्चा होईल अशी माहिती आहे. तसेच. यावेळी या मार्गाचा विषय निकलात निघण्याची शक्यता देखील व्यक्त केली जात आहे.

कोकण रेल्वे कॉर्पोरेशन सल्लागार समितीत कोल्हापूरचे राज्यसभा खासदार धनंजय महाडिक आणि ललित गांधी सदस्य आहेत. महाडिक आणि गांधी यांनी कोल्हापूर -वैभववाडी रेल्वे मार्गाचा विषय अजेंड्यावर आणला आहे.

बुधवारी होणाऱ्या बैठकीत कोल्हापूर -वैभववाडी रेल्वे मार्ग लवकर पूर्ण होण्यासाठी चर्चा केली जाणार आहे. कोकण आणि दक्षिण महाराष्ट्राच्या विकासासाठी हा मार्ग लवकर होणे आवश्यक असल्याचे ललित गांधी यांनी म्हटले आहे.