पणजी: गोमंतकीय खाद्यसंकृतीतील प्रमुख आहार शीतकढी- साईस, माशांचे हुमण करायचे म्हटले, की त्यात कोकम सोल हवे, शाकाहारी असो किंवा मांसाहारी जेवण असो. जेवणानंतर सोलकढी प्यायली नाही, तर जेवण पूर्ण होत नाही.

या कोकमाचा बाजारात भाव वाढला आहे, कारण, यंदा कोकम पिकात सुमारे ४० टक्क्यांनी घट झाल्याचे अनुमान व्यक्त केले जात आहे. अनियमित पाऊस, ढगाळ वातावरण आणि उष्णतेमुळे कोकम पिकात घट झाली आहे. कोकमच्या फळधारणेला उशीर झाला असून जरी येणाऱ्या काळात कोकम पीक चांगले आले तरी ते सुकवता येणार नाही त्यामुळे शेतकऱ्यांना तोटा होईल.

मागील काही वर्षांच्या तुलनेत यंदा कोकम उत्पादनात घट झाली आहे. पूर्वी आम्ही कोकमची सोले बाजारात विक्रीसाठी घेऊन जायचो, परंतु यंदा तुटवडा असल्याने अनेकजन घरी येऊनच खरेदी करतात. दरवर्षी मिळणाऱ्या कोकमाच्या तुलनेत यंदा सुमारे ३५ ते ४० टक्के उत्पादनात घट झाली आहे.

- संजय कारबोटकर, कोकम उत्पादक.

यंदा कोकम फळधारणेला उशीर झाला आहे, त्यामुळे येत्या काळात कोकमचे पीक येईल, परंतु ड्रायरच्या सहाय्याने ती सुकविली, तरच सोले व इतर उत्पादन घेता येईल अन्यथा पावसामुळे सोले तयार करणे कठीण होईल.

- दत्तप्रसाद देसाई, उपसंचालक, कृषी संचालनालय.

दरही वाढले!

अनियमित थंडी आणि त्यानंतरचा प्रचंड उष्मा, ढगाळ वातावरणामुळे फुलोऱ्यात असतानाच फळांची गळती यामुळे कोकम पिकात घट झाली आहे.

उत्पादनात घट झाल्याने आगळ आणि कोकम सोलाचे उत्पादन घटले आहे. त्यामुळे दरात भरमसाठ वाढ झाली आहे. पणजी बाजारात हजार रुपये प्रती किलो दराने विक्री केली जात आहे.

कोकम उत्पादनावर अवलंबून असलेल्या शेतकऱ्यांना देखील उत्पादन घटल्याने फटका बसला आहे.

राज्यातील कोकम लागवडीखालील क्षेत्रफळ व उत्पादन

वर्ष क्षेत्रफळ उत्पादन

२०२४-२५ ८६४६ ८३०

२०२३-२४ ८६७४ ८२४

२०२२-२३ ९३१९ ८४८

२०२१-२२ ८९३३ ७९५

२०२०-२१ ९२५८ ८२४