Goa Crime News: केस कापायला जाणार्‍या पंधरा वर्षीय मुलासह त्याच्या अल्पवयीन मित्रावर क्षुल्लक कारणावरुन सुरी हल्ला करून त्यांना शिवीगाळ केल्याप्रकरणी म्हापसा पोलिसांनी नास्नोळा येथील शशिकांत (शेशलो) म्हावळणकर (५९) यास सोमवारी मयडे येथून शिताफीने अटक केली.

संशयिताविरुद्ध म्हापसा पोलिसांनी भारतीय दंड संहितेच्या कलम ५०४, ३२४, ५०६(२) व गोवा बाल कायद्याच्या कलम ८च्या अंतर्गत गुन्हा नोंदविला आहे.

याप्रकरणी पीडित मुलाचे वडील रमेश नाईक हे तक्रारदार आहेत. पीडित मुलगा व त्याचा मित्र संशयिताच्या घराजवळ आपल्या आणखी एका मित्रास बोलविण्यासाठी गेले होते.

हा मित्र संशयिताच्या घरीच भाडोत्री म्हणून राहायला असतो. हे तिघेही मित्र सोबतच केस कापण्यासाठी जाणार होते.

यावेळी क्षुल्लक कारणास्तव संशयिताने पीडितास व त्याच्या मित्रास शिवीगाळ केली. त्यानंतर, संशयिताने या दोन्ही अल्पवयीन मुलांवर सुरी हल्ला करुन त्यांना मारण्यासाठी त्यांचा पाठलाग केला होता.