Goa Crime: नात्यातीलच एका 7 वर्षीय मुलाचे अपहरण केल्याच्या आरोपावरून केपे पोलिसांनी बसुराज कित्तूर याला अटक केली आहे. तो मूळचा कर्नाटकचा आहे. कित्तूर याच्या महिला नातेवाईकानेच याबाबत तक्रार दिली होती.

बसुराज कित्तूर हा मूळचा कर्नाटकचा रहिवाशी आहे. त्याची नातेवाईक शिल्पा सागर प्रसाद (मूळ राहणार घोटमंडी) यांनी याबाबत तक्रार दिली होती. वाईट उद्देशाने त्याने मुलाचे अपहरण केल्याचे शिल्पा प्रसाद यांनी तक्रारीत म्हटले होते. त्यानंतर पोलिसांनी तातडीने कार्यवाही सुरू केली होती.

पोलिसांनी अपहृत मुलाचा शोध घेण्यास सुरवात केली. सुमारे 8 तास शिरवई, तिळामळ येथील जंगलात पोलिसांचे पथक शोध घेत होते. पोलिस निरीक्षक वैभव धनंज यांनी या पथकाचे नेतृत्व केले. या शोधात बसुराज कित्तूर हा अपहरण केलेल्या मुलासह आढळून आला.

पोलिसांनी कित्तूर याला अटक करत संबंधित लहान मुलाची सुटका केली आहे. या मुलाकडून पोलिस माहिती घेतली असून त्याला त्याच्या आईच्या स्वाधीन केले आहे. दरम्यान, केपे पोलिसांच्या या कामगिरीबद्दल परिसरात त्यांचे कौतूक होत आहे.