मडगाव: कर्नाटकातले ट्रॉलर्स गोव्याच्या सागरी हद्दीत प्रवेश करून बेकायदा मासेमारी करीत असल्याचे प्रकार हल्‍ली वाढले आहेत. मागच्‍या दोन वर्षांत अशी बेकायदेेशीर मासेमारी करणाऱ्या दहा ट्रॉलर्सवर गुन्हे दाखल करण्यात आले असून त्‍यांच्‍याकडून १४.८० लाख रुपये दंड वसूल केला.

लोकसभेत खासदार विरियातो फर्नांडिस यांच्या प्रश्नावर लेखी उत्तरात ही माहिती देण्यात आली. सरकारने कर्नाटकातील १० ट्रॉलर्सवर गुन्हे दाखल केले आहेत आणि २०२२ ते २०२४ या कालावधीत १४ लाख ८० हजार रुपये रुपयांचा दंड ठोठावला, असे केंद्रीय मासेमारी आणि पशुसंवर्धन मंत्री राजीव रंजन सिंग यांनी आपल्‍या उत्तरात म्‍हटले आहे.

बुल ट्रॉलिंग, एलईडी मासेमारी तसेच परप्रांतीय ट्रॉलर्सची घुसखोरी याबद्दल विरियातो यांनी प्रश्न उपस्थित केला होता. सागरी राज्ये, केंद्रशासित प्रदेशांना संबंधित आदेशांचे उल्लंघन करणाऱ्या मासेमारी ट्रॉलर्सची नोंदणी किंवा परवाना तात्पुरते निलंबित करण्याचे, वारंवार उल्लंघन करणाऱ्या अशा मासेमारी बोटींवर कडक कारवाईच्या सूचना देण्यात आल्या, असे लेखी उत्तरात म्हटले आहे. चीनचे मासेमारी करणारे ट्रॉलर भारतीय जलक्षेत्रात मासेमारी करत असल्याचा कोणताही अहवाल नाही, असे या उत्तरात स्‍पष्‍ट केले आहे.