Goa: म्हादईच्या लढ्यात आता कन्नड महासंघही उतरणार आहे. म्हादईसाठी गोव्याची मागणी योग्य असून न्यायासाठी कळसा-भांडुरा प्रकल्पाला आपला विरोध आहे, असे कन्नड महासंघाचे नेते सिद्धण्णा मेटी यांनी जाहीर केले आहे.

म्हादई गोव्यासाठी किती महत्त्वाची आहे, तिच्यावर येथील जनजीवन अवलंबून आहे, आपले प्रकल्प थांबवा, असे कर्नाटकच्या मुख्यमंत्र्यांना आम्ही सांगणार आहोत, असेही मेटी म्हणाले.

मुख्यमंत्र्यांना आव्हान

‘सेव्ह म्हादई, सेव्ह गोवा फ्रंट’ या संघटनेच्या पुढाकाराखाली सर्व पक्षीय नेत्यांनी आता एकत्रित येण्याचे ठरविले असून, 16 जानेवारी रोजी ‘चलो साखळी’चा नारा दिला आहे.

मुख्यमंत्री डॉ. प्रमोद सावंत यांच्या मतदारसंघातच सर्वपक्षीय जाहीर सभा घेणार असल्याची माहिती ‘सेव्ह म्हादई, सेव्ह गोवा’चे हृदयनाथ शिरोडकर यांनी शनिवारी पत्रकार परिषदेत दिली. या परिषदेला भाजप आणि आरजी वगळता इतर राजकीय पक्षांचे नेते आणि समाज कार्यकर्ते उपस्थित होते.