फोंडा: भाषा टिकवायची असेल तर नित्य जीवनात तिचा वापर होणे आवश्यक आहे, असे प्रतिपादन कालिदास मराठे यांनी केले. मराठी भाषा गौरव दिनानिमित्त आयोजित विद्यार्थी गौरव सोहळ्यात अध्यक्षस्थानावरून ते बोलत होते. मराठी विषयात सर्वाधिक गुण मिळविणाऱ्या बारावीच्या विद्यार्थ्यांचा सत्कार यावेळी करण्यात आला.

मराठे पुढे म्हणाले,की भाषा टिकवण्याची सुरुवात आपण आपल्या स्वाक्षरीपासून सुरू करू शकतो. घरातील मंडळी, नातेवाईक तसेच शेजाऱ्यांनाही त्याबाबत आग्रह धरू शकतो.

गोवा मराठी अकादमी, फोंडा शाखा आयोजित हा गुणगौरव कार्यक्रम, गोवा विद्याप्रसारक मंडळाच्या आगियार उच्च माध्यमिक विद्यालयाच्या सौजन्याने, फर्मागुडी येथील त्यांच्या सभागृहात झाला. व्यासपीठावर आयएमबीचे अध्यक्ष दशरथ परब, गोवा मराठी अकादमी फोंडा प्रभाग प्रमुख नितीन कोलवेकर, विद्या वृध्दी हायस्कूलचे अध्यक्ष उदय डांगी, प्रेमानंद नाईक व निलेश नाईक उपस्थित होते.कुसुमाग्रज यांच्या काही निवडक कवितांचे वाचन आर्या देसाई, वेदा कासार, रसिका जोशी, ॲड साधना फडके, निलेश नाईक, संपूर्णा भगत, नितीन कोलवेकर यांनी केले.

नितीन कोलवेकर यांनी प्रास्ताविक केले. विद्यार्थ्यांच्या वतीने कु. आर्या हिने विचार मांडले. सूत्रसंचालन श्रृती हजारे यांनी केले.