सासष्टी: सरकारने 100 टक्के अनुदान दिल्यास कदंब महामंडळ प्रवाशांना मोफत सेवा देऊ शकते, असे नावेलीचे आमदार व कदंब महामंडळाचे चेअरमन उल्हास तुयेकर यांनी सांगितले. महामंडळाला सरकारकडून दरवर्षी जे अनुदान दिले जाते.त्यातून ज्येष्ठ नागरिक, विद्यार्थ्यांना 50 टक्के सवलत दिली जाते.

('Kadamba' free service to passengers' in goa)

शिवाय पास पद्धतीचाही प्रवाशांना लाभ होतो. एका इलेक्ट्रिक बसची किंमत 1.40 कोटी रुपये आहे. शिवाय एका बसच्या चार बॅटऱ्या चार्ज कराव्या लागतात. एका बॅटरीला 30 ते 40 लाख रुपये खर्च येतो. या बसेस डिसेंबरपर्यंत महामंडळाच्या ताफ्यात सामील होतील, अशी आशा तुयेकर यांनी व्यक्त केली.

सध्या महामंडळातर्फे 50 इलेक्ट्रिक बसेस कार्यरत आहेत. या बसेस चालविण्यासाठी हैदराबाद येथील इवेय ट्रान्सपोर्ट प्रायव्हेट लिमिटेड कंपनीशी महामंडळाने करार केला असून कंपनीला दर बस मागे दर किमी अंतराला 75.87 रुपये दिले जातात. त्यामुळे महामंडळाला प्रत्येक बसमागे दर किमी मागे 51 रुपये तोटा सोसावा लागतो. तरीही महामंडळातर्फे गोव्यातील ग्रामीण भागातही बससेवा सुरू करण्याचा इरादा आहे. त्यामुळे आणखी 100 इलेक्ट्रिक बसेस महामंडळ घेणार असल्याचेही उल्हास तुयेकर यांनी सांगितले.