पणजी: प्रवाशांना घेऊन जाणाऱ्या कदंब बसचा अपघात झाल्याची घटना शुक्रवारी (०४ ऑक्टोबर) सकाळी उघडकीस आली. बसवरील नियंत्रण सुटल्याने चिंबल जंक्शन येथे बस पलटी झाली. यावेळी बसमध्ये दहा प्रवासी असल्याची माहिती असून, काहीजण किरकोळ जखमी झाले आहेत. जखमींवर बांबोळी येथील गोमेकॉत उपचार सुरु आहेत.

चिंबल जंक्शन उतारावरुन बस जात असताना बसवरील नियंत्रण सुटल्याने बस शेजारीज सुरु असलेल्या भुयारी मार्ग कामाच्या साईटवर जाऊन आदळली आणि पलटी झाली.

यावेळी बसमध्ये एकूण दहा प्रवासी होते. पोलिस आणि अग्निशमन दलाच्या जवानांनी तात्काळ घटनास्थळी धाव घेत प्रवाशांना सुखरुप बाहेर काढले. यातील काहीजण किरकोळ जखमी झाल्याची माहिती असून, त्यांना उपचारासाठी गोमेकॉत दाखल करण्यात आले आहे.

ब्रेक फेल झाल्याने अपघात?

बस चालकाने दिलेल्या माहितीनुसार, चिंबल जंक्शन उतारावरुन बस जात असताना बसचा अचानक ब्रेक फेल झाला. बस मार्गावरील इतर वाहनांवर जाऊन धडकू नये यासाठी बस मुख्य मार्गावरुन बाहेर वळवल्याची माहिती चालकाने दिली.

अपघातानंतर स्थानिक आमदार रुडॉल्फ फर्नांडिस यांनी घटनास्थळी दाखल होत परिस्थितीचा आढावा घेतला. पोलिस घटनास्थळी दाखल झाले असून अधिक तपास सुरु आहे.