Vasco : चिकोळणा बोगमाळो पंचायत क्षेत्रात पर्यटनाला चालना देण्यासाठी लवकरच बोगमाळो येथील तलावात नौकाविहार ( बोटिंग) सुरू करण्यात येणार असल्याचे पंचायत मंत्री मावीन गुदिन्हो यांनी सांगितले. चिखली पंचायत क्षेत्रातील जॉगर्स पार्कचे नूतनीकरण व दुसऱ्या टप्प्याचे काम पूर्ण झाल्याने लवकरच उद्‍घाटन करण्यात येणार असल्याचे त्यांनी स्पष्ट केले.

बोगमाळो किनाऱ्यावरील नवीन संरक्षण भिंतीचे तसेच सौंदर्यीकरणाचे उद्‍घाटन मंत्री गुदिन्हो यांच्या हस्ते करण्यात आले. याप्रसंगी पंचायत उपसंचालक प्रसिध्द नाईक, मुरगावचे गटविकास अधिकारी प्रीतेश शेट्ये, बोगमाळोचे सरपंच संकल्प महाले, उपसरपंच लोरेना कुन्हा, चिखलीचे सरपंच कमलाप्रसाद यादव, बोगमाळीचे पंच व इतर मंडळी उपस्थित होते. संरक्षण भिंत बांधताना तेथे लोकांना बसण्यासाठी बाकड्यांची सोय करण्यात आली आहे.

बोगमाळोसारख्या सुंदर व शांत गावात पर्यटनाला चालना देण्यासाठी आमचे प्रयत्न आहेत. या परिसराला अधिकाअधिक सुशोभित करण्यासाठी तेथील तारांकित हॉटेल व्यावसायिकची मदत घेतली जाणार आहे, असे गुदिन्हो यांनी सांगितले. प्रसिध्द नाईक यांनी सांगितले की, लोरेना कुन्हा यांच्या कार्यकाळात सदर संरक्षण भिंत कोसळल्यावर त्यांनी सतत पाठपुरवा करून नवीन संरक्षण भिंत बांधण्यासाठी प्रयत्न केले होते.

पंचायत मंत्री गुदिन्हो यांच्या सहकार्यामुळे सदर पंचायत अधिकाअधिक विकास कामे होत आहेत. सरपंच महाले यांनी चिकोळणा बोगमाळी पंचायतीला मंत्री गुदिन्हो यांचे सतत सहकार्य असल्याचे सांगितले. त्यांच्या सहकार्याने या पंचायतीमध्ये अधिकाअधिक विकासकामे मार्गी लागत असल्याचे त्यांनी स्पष्ट केले.