Jit Arolkar : समर्थक असो वा विरोधक; सर्वांची कामं करणार असल्याचं मगोपचे मांद्रेचे आमदार जीत आरोलकर यांनी म्हटलं आहे. पंचायत निवडणुकीसाठी मतदान केल्यानंतर पत्रकारांशी बोलताना आरोलकर यांनी स्थानिक राजकारणावरही भाष्य केलं आहे.

ग्रामपंचायत निवडणूक म्हणजे गावातील सर्वसामान्य लोकांची निवडणूक असते. ही काही विधानसभा, लोकसभा निवडणूक नाही. त्यामुळे यात आपला दुसरा असं काही नसतं. सगळे आपल्यासाठी समान असून जेवढे लोक पंच म्हणून निवडून येतील त्यांची आमदार या नात्याने काम करण्याची आपली जबाबदारी असल्याचंही जीत आरोलकर यांनी स्पष्ट केलं आहे.

काही वार्डामध्ये 4 ते 8 जण निवडणुकीच्या रिंगणात आहेत. मात्र जो निवडून येईल तो त्या भागाचा नेता असेल. त्यामुळे कोणताही भेदभाव न करता आपण सर्वांनाच मदत करणार असून आपल्या मतदारसंघातील समस्या सोडवण्यासाठी प्रयत्नशील असल्याचंही जीत आरोलकर यांनी स्पष्ट केलं आहे. जीत आरोलकर यांच्या याच वक्तव्याची सध्या परिसरात जोरदार चर्चा सुरु आहे. मांद्रे भागात मतदारांचा मतदानासाठी उत्स्फूर्त प्रतिसाद पाहायला मिळत आहे.