Dudhsagar Tourism Season

कुळे: दूधसागर जीप टूर ऑपरेटर्स संघटनेच्या पदाधिकाऱ्यांनी उपोषण मागे घेतल्यानंतर रविवारी २४५ जीप गाड्या पर्यटकांना घेऊन दूधसागर धबधब्याकडे गेल्या. बऱ्याच दिवसांनंतर दूधसागर धबधब्याचे दर्शन झाल्याने सुमारे १,७१५ पर्यटकांनी तेथे आनंदोत्सव साजरा केला.

संकेतस्थळ आणि काऊंटर संघटनेकडे परत देण्याच्या मुख्यमंत्र्यांच्या आश्वासनानंतर शनिवारपासून सुरू केलेले साखळी उपोषण मागे घेण्यात आल्याचे दूधसागर जीप टूर ऑपरेटर्सचे अध्यक्ष नीलेश वेळीप यांनी आज अधिकृतरित्या जाहीर केले. शनिवारी मुख्यमंत्र्यांसोबत यासंदर्भात सविस्तर चर्चा झाली. एक महिना पर्यटन विकास महामंडळाचा काऊंटर सुरू राहणार आहे.

जीप टूर ऑपरेटर्सचे आंदोलन संपुष्टात आल्यानंतर शनिवारी आणि रविवारी असे दोन्ही दिवस मिळून २,६३२ पर्यटकांनी दूधसागर धबधब्याला भेट दिली. शनिवारपासून पर्यटन हंगाम सुरू झाल्याने पर्यटकांची कुळे गावात मोठी गर्दी झाली होती.