Valpoi News : वाळपई , सरकारतर्फे ज्यांनी कामधेनू योजनेअंतर्गत गायी खरेदी केलेल्या आहेत. त्यांचे पालन-पोषण आपल्या गोठ्यातच केले पाहिजे.

अशा योजनेच्या गायी जर रस्त्यांवर आढळल्यास त्यांची योजना बंद करून अन्य गायीदेखील सरकार ताब्यात घेणार आहे, तसे निर्देशही पशुसंवर्धन खात्याला दिले आहेत, असे प्रतिपादन मुख्यमंत्री डाॅ. प्रमोद सावंत यांनी केले.

वाळपई-नाणूस येथील अखिल विश्व जय श्रीराम गोसंवर्धन केंद्रात भेटीवेळी बोलताना मुख्यमंत्र्यांनी वरील इशारा दिला आहे.

केंद्राचे अध्यक्ष हनुमंत परब, खजिनदार लक्ष्मण जोशी, सल्लागार डॉ. वल्लभ धायमोडकर, माजी उपसभापती नरहरी हळदणकर यांची यावेळी उपस्थिती होती. हनुमंत परब यांनी प्रास्ताविक केले. सावंत यांचा शाल, श्रीफळ देऊन सन्मानही करण्यात आला. सावंत यांनी सप्तगोमाता मंदिराला भेट देऊन गायींची व श्रीकृष्ण मूर्तीची मनोभावे पूजा केली.

राज्यात गोशाळांमुळे भटक्या गोवंशांचे पालन होते आहे. गोवंश पालन करताना लोकांचाही त्रास गोशाळांना सोसावा लागतो आहे. गोशाळेत गो-निर्मिती उत्पादनासाठी जीएसटी कर रद्दतेसाठी प्रयत्न करणार आहे.

- डॉ. प्रमोद सावंत, मुख्यमंत्री

अपघातांची वाढती संख्या

दिवसेंदिवस भटक्या गुरांची संख्या वाढतच चालली आहे. त्यामुळे राज्यात गुरांवर दुचाकींची धडक बसून अपघातांची संख्या चिंताजनक आहे.

रस्त्यांवरील अपघातात माणसांचा जीव जातो आहे. त्यावर नियंत्रण आणण्यासाठी सरकार कठोर कारवाई करण्यासाठी तयार असणार आहे, असे मुख्यमंत्र्यांनी सांगितले.