Dona Paula Jetty "दोना पावला जेटीवर पर्यटकांना शुल्क आकारले जाणार आहे. या शुल्क आकारणीतून स्थानिकांना वगळण्यात येणार असले तरी ते ओळखणार कसे?" असा सवाल महसूल मंत्री बाबूश मोन्सेरात यांनी केला आहे.

दैनिक गोमन्तकशी बोलताना ते म्हणाले की, "दोना पावला जेटीच्या उद्‍घाटनाच्या कार्यक्रमाचे निमंत्रण आपल्याला होते. परंतु आपण आजारी असल्याने गेलो नाही."

"जेटी पर्यटकांना खुली झाली ही चांगली बाब आहे. परंतु स्थानिक नागरिकांना ज्या पद्धतीने शुल्क आकारले जाणार नाही, असे म्हटले आहे ते आपणास अद्याप समजले नाही. कारण स्थानिकाबरोबर कोणी आल्यास प्रत्येकाची ओळख पटवणार काय?

हजारो पर्यटकांबरोबर शेकडो नागरिकही त्याठिकाणी जाणार आहेत. त्यामुळे प्रत्येकाची ओळख पटविणे शक्य आहे का?" असा सवालही त्यांनी केला.

दोना पावला जेटी डिसेंबरमध्ये खुले करण्याची तयारी पर्यटन खात्याने केली होती. परंतु त्यानंतर जानेवारी महिना गेला, अखेर पर्यटन मंत्री रोहन खंवटेच्या वाढदिवसाचे औचित्य साधला गेले आणि ती जेटी पर्यटकांसाठी खुली झाली.

दरम्यानच्या काळात मात्र दोना पावला जेटीपरिसरात विविध व्यवसाय करणाऱ्यांमध्ये मात्र वेगवेगळी चर्चा सुरू होती. जेटी खुली होत नसल्यामुळे तेथील व्यवसायिकांना मंत्री बाबूश मोन्सेरात यांच्याकडे वारंवार त्याविषयी विचारणा सुरू केली होती.