पर्वरी: आयपीएल क्रिकेट सामन्यांवर सट्टा लावणाऱ्यांविरोधात गोवा पोलिसांनी गुरूवारी (१० एप्रिल)) मोठी कारवाई करत सट्टेबाजीचा आणखी एक प्रकार उघडकीस आणला आहे. पर्वरी पोलिसांनी दिल्ली कॅपिटल्स विरुद्ध रॉयल चॅलेंजर्स बंगलोर या क्रिकेट सामन्यावर ऑनलाईन सट्टा लावणाऱ्या तिघांना रंगेहाथ पकडलं.

पर्वरी पोलिसांना एका खासगी अपार्टमेंटमध्ये आयपीएल सामन्यावर सट्टा सुरू असल्याची माहिती मिळाल्यानंतर तत्काळ कारवाई करण्यात आली.

पोलिसांनी दिलेल्या माहितीनुसार, या प्रकरणात मध्य प्रदेश आणि पश्चिम बंगाल येथील तिघांना अटक करण्यात आली असून, त्यांच्याकडून मोठ्या प्रमाणावर इलेक्ट्रॉनिक उपकरणे आणि सट्टेबाजीसाठी वापरली जाणारं साहित्य जप्त करण्यात आली आहे.

या प्रकरणी विजय कुमार मनवानी (वय ४५, रा. मध्य प्रदेश), मुसा शेख (वय २९, रा. पश्चिम बंगाल) आणि सुदेश कुमार ओटवानी (वय २५, रा. मध्य प्रदेश) या तिघांना अटक करण्यात आलीय. पोलिसांनी दिलेल्या माहितीनुसार, या तिघांनी सुकूर येथील एक व्हिला भाड्यानं घेतला होता आणि तेथून आयपीएल सामन्यांवर ऑनलाइन सट्टेबाजी सुरू होती.

मुद्देमाल जप्त

या छाप्यात पोलिसांनी ७ मोबाईल फोन्स, एक लॅपटॉप, आणि इतर इलेक्ट्रॉनिक अ‍ॅक्सेसरीज असा सुमारे २ लाख १० हजार रुपयांचा मुद्देमाल जप्त केला आहे. इलेक्ट्रॉनिक उपकरणांचा वापर ऑनलाइन सट्टेबाजीसाठी केला जात असल्याची माहिती पोलिसांनी दिलीय. ही कारवाई गुरुवारी (१० एप्रिल) रात्री १०:५५ वाजता सुरू होऊन शुक्रवारी (११ एप्रिल) मध्यरात्री १२:३० वाजेपर्यंत चालली.

ऑनलाईन सट्टा लावणाऱ्यांचा पर्दाफाश

इंडियन प्रीमियर लीग (IPL 2025) क्रिकेट स्पर्धेच्या पार्श्वभूमीवर गोव्यात सट्टेबाजीच्या प्रमाणात लक्षणीय वाढ झाली असून, या प्रकारावर अंकुश ठेवण्यासाठी गोवा पोलीस सट्टेबाज टोळ्यांवर लक्ष ठेवून कारवाई करत आहेत. राज्यात आयपीएल सुरू झाल्यापासून अनेक ठिकाणी ऑनलाईन पद्धतीने सट्टा लावणाऱ्यांचा पर्दाफाश करण्यात आला आहे.