पणजी : पणजीसह राज्‍यातील प्रमुख शहरांतील सर्व रस्‍ते पहिल्‍याच पावसात धुवून गेले आहेत. या संपूर्ण रस्‍ता कामांची न्‍यायालयीन चौकशी करावी, अशी मागणी तृणमुल काँग्रेसचे ट्रोजन डिमेलो यांनी प्रसिद्धी पत्रकाद्वारे केली आहे.

पहिल्‍याच पावसात संपूर्ण रज्‍यातील रस्ते वाहून गेले आहेत. यामुळे पादचारी, वाहनचालकांसाठी ते धोकादायक बनले आहेत. तसेच अपघातांमुळे काहींनी आपला जीव गमवावा लागला आहे. विद्यमान मुख्यमंत्र्यांच्या नेतृत्वाखालील मागील सरकारने हे रस्ते केले होते. विद्यमान साबांखा मंत्र्यांनी पणजीतील रस्‍ता कामाच्‍या कंत्राटदारावर दोन वर्षांची बंदी घातली, पण ज्‍यांच्‍या काळात हे रस्‍ते केले गेले त्‍यांचे काय, असा सवाल ट्रोजन यांनी केला.

मंत्री मोन्सेरात यांनी पणजीतील रस्त्यांची चौकशी करून संबंधित अभियंत्यांवर कारवाई करण्याची मागणी केली हाती. पण केवळ राजधानी पणजीतीलच नव्‍हे तर संपूर्ण राज्‍यातील रस्त्यांची दुरवस्था झाली आहे.