गोवा म्हणजे दारू, बिकिनी असे चित्र रंगवणाऱ्या सोशल मिडियावरील एका कथित इन्फ्लुएंसर तरूणीचा व्हिडिओ गोव्यात सर्वत्र चांगलाचा व्हायरल झाला. त्यानंतर या व्हिडिओबाबत सर्व स्तरातून संतप्त प्रतिक्रिया समोर आल्या. विधानसभेत देखील अशापद्धतीने गोव्याची बदनामी करणाऱ्यावर कारवाई करण्याची मागणी वास्कोचे आमदार कृष्णा दाजी साळकर यांनी केली.

दरम्यान, व्हिडिओवरून सर्वत्र पडसाद उमटल्यानंतर अखेर या तरूणींनी माझा गोव्याची बदनामी करण्याचा उद्देश नव्हता असे म्हणत होत जोडून गोवा आणि गोंयकारांची माफी मागितली आहे.

झाले असे की मोनालिसा घोष या तरूणीने इन्स्टाग्राम अकाउंटवरून गोव्याबाबत एक व्हिडिओ शेअर केला होता. या व्हिडिओत गोव्यातील झोमॅटोवर फक्त दारूच मिळते, चहा पिल्यावर दंड आकारला जातो आणि कपडे खरेदीला गेल्यावर फक्त बिकिनी मिळते अशा आशयाचा  व्हिडिओ  तरूणीने तिच्या 'थॉटफूल गर्ल' या अकाउंटवरून शेअर केला होता.

दरम्यान, या व्हिडिओवरून मोनालिसा घोषने माफी मागितली आहे. "मी अलिकडे गोव्यात गेले होते, त्यावेळी मी येथील बीच, चर्च याठीकणी काही कॉमेडी व्हिडिओ बनवले होते. या व्हिडिओत काही अक्षेपार्ह शब्द होते याची मला आत्ता जाणीव होत आहे. पण, माझा गोव्याची बदनामी करण्याचा माझा कोणताही उद्देश नव्हता. पण, माझ्या या व्हिडिओमुळे गोवा आणि गोंयकरांच्या भावना दुखावल्या असतील तर मी मनापासून माफी मागते असे या तरूणीने म्हटले आहे."

Instagram Reels मधून गोव्याची बदनामी केल्यास होणार कारवाई

सोशल मिडियाच्या माध्यमातून गोव्याची बदनामी केल्यास आता त्या व्यक्तीविरोधात कारवाई केली जाईल. अशी माहिती राज्याचे मुख्यमंत्री प्रमोद सावंत यांनी आज पावसाळी अधिवेशानाच्या अकराव्या दिवशी सभागृहात दिली.

वास्कोचे आमदार कृष्णा दाजी साळकर यांनी शून्य कालमध्ये याबाबत प्रश्न विचारला, त्यावर मुख्यमंत्री सावंत यांनी उत्तर दिले.