Goa Medical College Food Stalls : सध्या राज्यात अन्न सुरक्षेचा मुद्दा चर्चेचा मुद्दा बनला आहे. यातच गोव्याची जीवनदायिनी असलेल्या गोवा वैद्यकीय महाविद्यालयाबाहेरील फूड स्टॉल्सचीही तपासणी करण्यात आली. मोठ्या प्रमाणात नागरिक आरोग्य तपासणीसाठी GMC मध्ये येत असतात.

अशावेळी बहुतांश लोक हे बाहेर असलेल्या फूड स्टॉल्सवरच उपलब्ध असलेल्या गोष्टी खातात. यामध्ये स्वच्छता आणि अन्न सुरक्षा मानके राखली जातात का? याची खात्री करण्यासाठी FDA ने GMC च्या परिसरातील खाद्यपदार्थांच्या स्टॉल्सची तपासणी केली.

याबाबत आरोग्य मंत्री विश्वजित राणे यांनी सांगितले की, FDA संचालकांना स्वच्छतेच्या मुद्द्यांवर अत्यंत कडक राहण्याचे निर्देश दिले आहेत, मग ते रेस्टॉरंट असोत, खाद्यपदार्थांच्या गाड्या असोत किंवा स्वयं-सहायता गट असोत.

अन्नपदार्थांच्या बाबतीत कोणताही हलगर्जीपणा खपवून घेतला जाणार नाही. जे अस्वच्छ परिस्थितीत काम करतात, अन्न तयार करतात आणि अन्न सुरक्षा नियमांचे पालन करत नाहीत त्यांचे परवाने निलंबित केले जातील, असा इशारा आरोग्यमंत्र्यांनी दिला आहे.