पणजी: भौगोलिकदृष्ट्या केवळ गोव्यातच मिळणारा आणि त्याच्या वैशिष्ट्यपूर्ण चवीमुळे देशभर प्रसिद्ध असणाऱ्या मानकुराद आंब्याचा हंगाम टिपेवर आहे. चवीला अत्यंत गोड आणि केवळ गर असणारा आगळावेगळा आंबा यंदा एकाचवेळी आल्याने जास्तीत जास्त आठवडाभर मिळण्याची शक्यता आहे.

एरव्ही हजारोंच्या किमतीला विकला जाणारा हा आंबा सध्या अत्यंत कमी दरात तो सर्वत्र उपलब्ध आहे. केवळ तीन, चारशे रुपयांत डझनभर मिळत आहे. साहजिकच खवय्यांसाठी ही मेजवानी आहे. मात्र, हा हंगाम पुढील पाच सहा दिवसच टिकणार आहे त्यामुळे त्या स्थितीत उठा आणि बाजारातून मानकुराद घेऊन या. त्याची चव घ्या. कारण या चवीसाठी तुम्हाला पुढच्या वर्षाच्या हंगामाची वाट बघावी लागेल. कोरोनामुळे मागील दोन वर्षे मार्केट उपलब्ध नसल्यामुळे विक्रेत्यांना त्याची विक्री करता आली नाही आणि ग्राहकांना तो सहज उपलब्ध झाला नाही.