पणजी : राज्य पोलिस तक्रार निवारण प्राधिकरणाच्या (एसपीसीए) सदस्य म्हणून माजी पोलिस महासंचालक इंद्रदेव शुक्ला यांची नियुक्ती करण्यात आली आहे. पर्वरी येथील सचिवालयात झालेल्या मंत्रिमंडळ बैठकीत त्याला मान्यता देण्यात आली आहे. सध्या या प्राधिकरणाचे अजून एक सदस्यपद रिक्त आहे.

माजी पोलिस महासंचालक इंद्रदेव शुक्ला हे निवृत्तीपूर्वी नोव्हेंबर 21 मध्ये गोव्यात आले होते व मार्च 22 मध्ये ते येथूनच निवृत्त झाले होते. त्यांनी यापूर्वीही अधीक्षक म्हणून गोव्यात काम केले आहे. या प्राधिकरण अध्यक्षपदी उच्च न्यायालयाच्या निवृत्त न्यायमूर्ती नुतन सरदेसाई यांची वर्णी लागली आहे. प्राधिकरणाकडे 100 हून अधिक तक्रारी प्रलंबित असून काहींची अंतिम सुनावणी होऊन ती आदेशासाठी प्रलंबित होती. या प्राधिकरणावरील अध्यक्ष आर.एम.एस. खांडेपारकर यांच्या निवृत्तीनंतर हे पद रिक्त होते. मात्र अध्यक्ष नियुक्तीनंतर सदस्य निवृत्त झाले होते. त्यामुळे हे प्राधिकरण ठप्प झाले होते.