Goa Stray Cattle Issue: राज्यातील भटक्या गुरांची समस्या दिवसेंदिवस गंभीर बनत चालली आहे. काल (मंगळवारी) सकाळी केळबायवाडा-मये येथील प्राथमिक आरोग्य केंद्रासमोरील जंक्शनवर भटक्या गुरांनी केलेल्या हल्ल्यात दुचाकीवरील दाम्पत्य जखमी झाले.

जखमी शिरोडकर दाम्पत्य हे मये येथील असल्याची माहिती मिळाली आहे. प्राप्त माहिती अशी, की गावकरवाडा-मये येथील शिरोडकर दाम्पत्य स्कूटरवरुन डिचोलीच्या दिशेने जात होते. केळबायवाडा येथे चढणीवर पोचताच रस्त्यावरील गुरांनी स्कूटरला धडक दिली. त्यात शिरोडकर नवरा-बायको स्कूटरसह रस्त्यावर पडले.

त्याबाजूने जाणारे स्वयंम कामत यांनी लागलीच जखमी दामपत्याला प्राथमिक आरोग्य केंद्रात नेले. तिथे उपचार करुन त्यांना घरी पाठवले. मये भागात मोकाट गुरांची समस्या दिवसेंदिवस गंभीर बनत चालली आहे. केळबायवाडा ते वण्ण्यारपर्यंत तर सदैव गुरे रस्त्यावर संचार करताना आढळून येतात. वर्षांपूर्वी गुरांनी केलेल्या हल्ल्यात तेथीलच एका हॉटेलमालकाचे दोन्ही हात फ्रॅक्चर झाले होते. मोठा अनर्थ घडण्यापूर्वी या गुरांचा बंदोबस्त करावा, अशी मागणी होत आहे.