बॅलेटद्वारे मतदान करण्याची प्रक्रिया गोव्यात सुरू झाली असून यात मुरगाव तालुक्यातील चारही मतदारसंघातून एकूण 765 जेष्ठ नागरिकांनी बॅलेटद्वारे मतदान केले. बॅलेटद्वारे मतदान करण्यासाठी अनेक ज्येष्ठ नागरिकांनी उत्सुकता दाखवली.

केंद्रीय निवडणूक आयोगाच्या (Election Commission) निर्देशानुसार ज्येष्ठ नागरिक, अपंग व्यक्तींसाठी मतदान सोयीचे व्हावे या दृष्टिकोनातून संबंधित व्यक्तींच्या घरी जाऊन बॅलेटद्वारे मतदान करण्याची प्रक्रिया शनिवारी सुरू करण्यात आली आहे.

बॅलेटद्वारे मतदान करण्यासाठी रविवारी अनेक ज्येष्ठ नागरिकांनी उत्सुकता दाखवल्याने या प्रक्रियेला उत्स्फूर्त प्रतिसाद लाभला. मात्र, या प्रक्रियेदरम्यान लोकांना अनेक अडचणींचा सामना करावा लागला असल्याची माहिती प्राप्त झाली.

मतदान कर्मचार्‍यांना मतदारांच्या तपशीलांची पडताळणी करणे, मताच्या गोपनीयतेसाठी कार्डबोर्ड विभाजन सेट करणे आणि बॅलेटवर मतदान कसे करावे याबद्दल स्पष्ट सूचना देणे, अशी अनेक कामे करावी लागत होती. त्यानुसार प्रक्रियेचे पालन करून मतदान कर्मचार्‍यांनी ही प्रक्रिया पूर्ण केली.

मुरगाव (Mormugao) तालुक्यातील चारही मतदारसंघातून वय 80 वरील ज्येष्ठ नागरिकांना या सुविधेचा लाभ उठविला.

यात कुठ्ठाळी मतदारसंघातून (215),दाबोळी मतदारसंघातून (212), वास्को मतदारसंघातून (207) व मुरगाव मतदारसंघातून (122) ज्येष्ठ नागरिकांनी बॅलटद्वारे मतदान करुन आपल्या मतदानाचा हक्क बजावला.एकूण मुरगाव तालुक्यातील चारही मतदारसंघातून 765 जेष्ठ नागरिकांनी बॅलेटद्वारे मतदान केले. सदर प्रक्रिया निर्वाचन अधिकारी, देखरेख अधिकारी, पोलिस, (police) कॅमेरा मॅन यांच्या देखरेखीखाली पार पडली.