Illegal Sand Extraction

बेकायदेशीरपणे रेतीची वाहतूक केल्याप्रकरणी डिचोली पोलिसांनी केलेल्या कारवाईत टिपर ट्रक जप्त करून ट्रकचालकाला अटक केली. अटक केलेल्या ट्रकचालकाचे नाव राजेश चव्हाण असे आहे. बुधवारी (ता.३०) उत्तर रात्री सव्वादोन वाजण्याच्या सुमारास पोलिस उपनिरीक्षक विकेश हडफडकर यांच्या नेतृत्वाखाली पोलिसांनी ही कारवाई केली.

मिळालेल्या माहितीनुसार, मायणा-न्हावेली येथील फेरीधक्क्याजवळून बेकायदेशीरपणे रेतीची वाहतूक करण्यात येत होती. याप्रकरणी कारवाई करताना पोलिसांनी जीए-०९-टी-६२६५ या क्रमांकाचा टीपर ट्रक ताब्यात घेतला. ट्रकचालक राजेश चव्हाण याच्यासह ट्रकमालक आनंद दळवी (सावर्डे) आणि रेती व्यावसायिक सुशांत नाईक (बेतकी) यांच्याविरोधात कायद्यान्वये गुन्हा नोंद केला.

पोलिसांची धडक कारवाई

डिचोलीचे पोलिस निरीक्षक राहुल नाईक यांच्या मार्गदर्शनाखाली एएसआय शिवा नाईक याप्रकरणी पुढील तपास करीत आहेत. दोन महिन्यांपूर्वी पोलिसांनी अशीच कारवाई करताना बेकायदेशीरपणे रेतीची वाहतूक करणारे दोन ट्रक जप्त करून दोघांना अटक केली होती. पोलिसांच्या या कारवाईमुळे वाळू माफियांचे धाबे दणाणले आहेत.