पणजी: वैध व्हिसाशिवाय भारतात बेकायदेशीररीत्या वास्तव केल्याप्रकरणी पेडणे येथील न्यायिक दंडाधिकारी प्रथमवर्ग न्यायालयाने दोन परदेशी नागरिकांना दोषी ठरवले आहे. ही शिक्षा न्यायमूर्ती शबनम नागवेकर यांनी दिली.

रशियन नागरिक सर्गेई झायटसेव्ह (वय ४७) आणि बेलारूस देशाच्या नागरिक याउहेनी कोझेल (वय ३६) तुये येथील मुरमुशे गावात गीतांजली आमोणकर यांच्या भाड्याच्या घरात राहत असल्याचे तपासात निष्पन्न झाल्याची माहिती न्यायालयात पोलिसांनी दिली.

न्यायालयाने शिक्षेवरील आदेश राखून ठेवला असून दोन्ही बाजूंचे युक्तिवाद ऐकल्यानंतर शिक्षा जाहीर करण्यात येणार आहे. सध्या दोन्ही दोषी आरोपी न्यायालयीन कोठडीत आहेत. २५ जून २०२५ रोजी पेडणे पोलिसांच्या हद्दीत नियमित गस्तीदरम्यान पोलिसांनी सदर घरात वास्तव्यास असलेल्या दोन परदेशी नागरिकांची कागदपत्रे तपासली.

तपासात असे आढळून आले की, दोघांचे पासपोर्ट वैध असले तरी त्यांची भारतीय व्हिसा मुदत संपलेली होती. तपासानुसार, सर्गेई झायटसेव्ह यांचा व्हिसा २१ जानेवारी २०२४ रोजी आणि याउहेनी कोझेल यांचा व्हिसा ५ सप्टेंबर २०२४ रोजी संपल्याचे सिद्ध झाले.