कळंगुट: प्रसिद्ध गायक मिका सिंग उर्फ अमरिक सिंग याच्याकडून हणजुणच्या किनारी भागात सिआरझेड नियमांचे उल्लंघन करत रहिवासी प्रकल्प तसेच सुरक्षित भिंतीचे अवैध बांधकाम सुरू आहे. या प्रकरणी माहिती अधिकार कार्यकर्ते रवी हरमलकर, गेम्बिनो ड्रेगो यांनी बुधवारी राज्य नगर नियोजन प्राधिकरणाच्या कार्यालयात तक्रार दाखल केली आहे.

(Illegal construction In Goa by singer Mika Singh)

हणजुण-कायसुव पंचायत क्षेत्रातील सेंट मायकल वाडो, सर्वे क्र. 603/1 येथे मिल्का सिंग यांने हणजुणच्या किनारी भागात स्वत:च्या घर, तसेच संरक्षण भिंतीचे बांधकाम करताना गोवा पंचायत राज कायद्याचा भंग केला. शिवाय सागरी क्षेत्र नियमांचेही उल्लंघन केले. याबाबत हणजुण-कायसुव पंचायत कार्यालयात 15 मे रोजी तक्रार दाखल केली होती. याची दखल घेत वादग्रस्त बांधकामाची पंचायत मंडळाकडून पाहाणी करण्यात आली होती. परंतू सिआरझेड कायद्याचे खुलेआम उल्लंघन झाले असतानाही मिका सिंगला केवळ नोटीस बजावण्यात आल्याचे हरमलकर यांनी सांगितले.

मिका याने कायदा धाब्यावर बसवून बांधकाम केले आहे. त्याच्यावर आणि त्या वादग्रस्त बांधकामावर कारवाई व्हावी अशी मागणी हरमलकर, ड्रेगो यांनी केली आहे.

मिका सिंगने आपल्या प्रसिद्धी आणि वलयाचा दुरुपयोग करीत हणजुणच्या किनारी भागात स्थानिक पंचायत, नगरनियोजन विभाग तसेच सागरी क्षेत्र नियमांचे खुलेआम उल्लंघन करीत बेकायदा बांधकाम केले. त्याच्यावर राज्य नगर नियोजन, उत्तर गोवा जिल्हाधिकारी कार्यालय, सिआरझेड प्राधिकरणाकडून त्वरित कारवाई करण्यात यावी. अन्यथा ग्रामस्थांसहित तीव्र आंदोलन केले जाईल.

रवी हरमलकर, माहिती अधिकार कार्यकर्ता