फोंडा: कुर्टीतील प्रभाग क्रमांक अकरामध्ये पंचायतीच्या मालकीची जमीन बेकायदा हडप करून बांधलेली दुकाने तसेच निवासी खोल्या, भंगारअड्डा आज शुक्रवारी पंचायतीच्या एका धडक कारवाईत पाडण्यात आला. या बेकायदा बांधकामांवर पंचायतीने बुलडोझर फिरवल्यामुळे पंचायत क्षेत्रात रस्त्याच्या कडेला व इतर ठिकाणी अतिक्रमण करणाऱ्यांचे धाबे दणाणले आहेत.

कुर्टी - खांडेपार पंचायतीच्या मालकीच्या बाराशे चौरस मीटर जमिनीत हे बांधकाम करण्यात आले होते. उंडिर - बांदोडा येथील दामोदर नाईक याने ही जमीन बळकावून त्यावर निवासी खोल्या तसेच दुकाने उभी केली होती व भाड्याने दिली होती. मात्र, पंचायतीला कोणताच महसूल मिळत नव्हता.

याप्रकरणी गेल्या २०१२ पासून न्यायालयीन लढा सुरू होता. कुर्टी - खांडेपार पंचायतीने या बेकायदा अतिक्रमणाविरुद्ध अतिरिक्त पंचायत संचालनालयात खटला दाखल केला होता, त्यावर सुनावणी होऊन पंचायतीच्या बाजूने निकाल लागला आणि निर्धारित वेळेत बेकायदा बांधकामे पाडण्याचा आदेश देण्यात आला होता.

कुर्टी - खांडेपार पंचायतीचे सरपंच नीळकंठ नाईक, पंचायत सचिव सचिन नाईक तसेच पंच सदस्य भिका केरकर व इतर पंच सदस्यांनी पुढाकार घेऊन ही बेकायदा अतिक्रमणे हटवली.