फर्मागुढी अभियांत्रिकी महाविद्यालय परिसरात गुंडागर्दी वाढत असून काल संध्याकाळी आयआयटीच्या एका विद्यार्थ्याला मारहाण केल्याप्रकरणी तीन जणांना फोंडा पोलिसांनी ताब्यात घेतले आहे. मात्र तिघेही अल्पवयीन असल्याचा दावा या नातेवाईकांनी केला आहे.

काल संध्याकाळी तिघेजण वाहनासह फर्मागुढी परिसरात गेले असता आयआयटीचा विद्यार्थी सुधांशू पांडे याने त्यांना हटकले. त्यामुळे राग आलेल्या तिघांनी सुधांशूला मारहाण करायला सुरवात केली. दारूची बाटली सुधांशूच्या डोक्यावर मारली.

सुधांशूला जबरदस्तीने गाडीत टाकून त्याच्याकडील पैसे काढून घेण्याचा प्रयत्न आणि तेथूनच पळ काढला. जखमी सुधांशूला फोंडा आयडी उपजिल्हा इस्पितळात उपचारासाठी दाखल करण्यात आले असून त्याची प्रकृती सुधारली असल्याची माहिती देण्यात आली. फोंडा पोलिसांनी तिन्ही संशयिताना ताब्यात घेतले असून पुढील चौकशी सुरु आहे.