ID Hospital Ponda : फोंडा तालुक्यासह लगतच्या तालुक्यातील गावातील रुग्णांना वरदान ठरलेल्या आयडी उपजिल्हा इस्पितळातील समस्यांमुळे रुग्णांसह त्यांच्या नातेवाईकांनाही त्रासाला आणि अडचणींना सामोरे जावे लागत आहे.

या इस्पितळातील सातपैकी पाच लिफ्ट सध्या बंद असून रुग्णांना जिने चढून तपासणीसाठी जावे लागत आहे. तर या इस्पितळात आरोग्य खात्याने अद्याप सर्जन पाठवला नसल्याने रुग्णांना मडगावच्या हॉस्पिसियो किंवा ‘गोमेकॉ’ इस्पितळात धाव घ्यावी लागत आहे.

फोंड्यातील आयडी उपजिल्हा इस्पितळ अद्ययावत स्वरुपात खुले झाले असले तरी या इस्पितळाकडे आरोग्य खात्याचे अक्षम्य दुर्लक्ष होत असल्याने रुग्णांची परवड होत आहे. इस्पितळातील सर्जनची जागा रिकामी आहे, मात्र नवीन सर्जन अद्याप आरोग्य खात्याने दिला नसल्याने रुग्णांना शस्त्रक्रियेसाठी इतर इस्पितळात धाव घ्यावी लागत आहे.

फोंडा आयडी उपजिल्हा इस्पितळातील लिफ्ट बंदच राहत असल्याने रुग्णांना अतिशय त्रास सहन करावा लागतो. त्यामुळे ही लिफ्टसेवा आधी व्यवस्थित करा आणि रुग्णांचे हाल वाचवा.

- जयराम नाईक, ढवळी - फोंडा

या इस्पितळात नवनवीन सुविधा आता उपलब्ध करणे गरजेचे आहे, मात्र लिफ्ट बंद सारखी समस्या उद्भवत असल्याने सरकारने त्याकडे आधी लक्ष देऊन रुग्णांची सोय करायला हवी.

- रामदास तु. हळदणकर, शांतीनगर - फोंडा