राज्यमंत्री श्रीपाद नाईक यांनी आपण भोमा आणि खोर्ली येथील ‘राष्ट्रीय हमरस्ता'प्रश्नी खोर्ली आणि भोमा ग्रामस्थांच्या पाठीशी असल्याचे सांगितले आहे. रस्त्यासाठी शेजारच्या पडीक शेतातून बायपास करण्यासाठी त्यांनी केंद्रीय मंत्री नितीन गडकरी यांना पत्र लिहिले असून या संबंधी गडकरी यांनी लक्ष घालण्याचे आश्वासन दिले आहे.

दरम्यान याआधी भोमा आणि खोर्ली येथील ‘राष्ट्रीय हमारस्ता 4-अ’चा विस्तार करून लोकांची घरे आणि गावातील मंदिरे पाडण्याऐवजी बगलमार्गाचा पर्याय वापरा अशी मागणी करणारे पत्र गोवा फॉरवर्डचे अध्यक्ष विजय सरदेसाई यांनी गोव्याचे मुख्य सचिव पुनीत कुमार गोयल यांना पाठविले होते.

गावात विकास करताना स्थानिकांना विश्वासात घेऊन करायचा असतो. तो त्यांच्यावर थोपवायचा नसतो. लोकांनी सरकारला बगलमार्गाचा पर्याय सुचविला आहे. हा पर्याय कमी खर्चिक आहे. तरीही सरकार आपल्याच म्हणण्यावर का अडून बसले आहे ते कळत नाही, असे सरदेसाई यांनी म्हटले होते.

याचसंबंधी आता राज्यमंत्री श्रीपाद नाईक यांनी आपण खोर्ली आणि भोमा ग्रामस्थांच्या पाठीशी असल्याचे सांगितले आहे. यासाठी त्यांनी केंद्रीय मंत्री नितीन गडकरी यांना पत्र लिहिले असून या प्रश्नी गडकरी यांनी लक्ष घालण्याचे आश्वासन दिले आहे.