डिचोली: पावसाच्या तडाख्यात साळ पंचायत क्षेत्रातील खोलपेवाडी येथे एका स्लॅबच्या घरावर भलामोठा ''केळ'' नामक वृक्ष कोसळला. या पडझडीत कोणताही अनर्थ घडला नसला, तरी दोन लाखाहून अधिक रुपयांच्या मालमत्तेचे नुकसान झाल्याचा अंदाज आहे.

झाड कोसळण्याची ही घटना काल (शुक्रवारी) रात्री साडे अकरा वाजण्याच्या सुमारास घडली. खोलपेवाडी येथील दयानंद नानोसकर यांच्या घरावर हे झाड कोसळले. डिचोली अग्निशमन दलाला या घटनेची माहिती मिळताच दलाचे उपअधिकारी व्ही. डी. गावकर, शिवाजी नाईक आणि महेश नाईक यांच्या नेतृत्वाखाली दलाच्या जवानांनी घटनास्थळी धाव घेतली.

जवानांनी मदतकार्य करून घरावर पडलेले झाड हटवले. त्यासाठी ‘क्रेन’ची मदत घेण्यात आली. शुक्रवारी मद्यरात्री सुरु केलेले काम शनिवारी दुपारपर्यंत पूर्ण करण्यात आले. झाड कोसळले, त्यावेळी घरातील मंडळी जागी होती. भलामोठा वृक्ष घरावर कोसळताच घराला सौम्य हादरा बसला. लागलीच घरातील मंडळी भयभीत होऊन घराबाहेर आली.

झाडाच्या धक्क्याबरोबर घराच्या मागील बाजूने जोडून असलेल्या भाड्याच्या खोलीच्या छप्परावरील सिमेंटचे पत्रे फुटले. सुदैवाने या पडझडीत अन्य कोणताही अनर्थ घडला नाही. या पडझडीत दोन लाखाहून अधिक रुपयांच्या मालमत्तेचे नुकसान झाले, अशी माहिती घरमालक नानोसकर यांनी सांगितले.

पडझडीची पाहणी!

घराशेजारील धोकादायक झाड कापावे, अशी तक्रार स्थानिक पंचायतीसह प्रशासकीय यंत्रणांकडे केली होती. तर दुसऱ्याबाजूने काल कोसळलेल्या झाडासह अन्य धोकादायक झाडे कापावीत, अशी मागणी स्थानिक पंचायतीने दीड वर्षांपूर्वी उपजिल्हाधिकाऱ्यांकडे केली होती. मात्र प्रशासकीय यंत्रणांनी याकडे दुर्लक्ष केल्यानेच कालची घटना घडली, अशी खंत घरमालकाने व्यक्त केली. झाड कोसळल्याची माहिती मिळताच आज सकाळी पंचसदस्य मनोहर शिंदे यांच्यासह तलाठ्यांकडून घराच्या पडझडीची पाहणी करण्यात आली.