Goa Casino देशभरातील लोकांनी पर्यटनासोबतच गोव्यातील कॅसिनोला आपली पसंती दर्शवली आहे. 'श्रीमंत लोकांचा जुगार' म्हणून समजला गेलेला गोव्यातील कॅसिनो व्यवसाय वर्षाचे बाराही महिने सुरु असून दिवसेंदिवस कॅसिनोमध्ये जुगार खेळण्यासाठी गोव्यात येणाऱ्या ग्राहकांच्या संख्येत वाढ होतेय.

त्यामुळेच आवश्यकता भासल्‍यास गोवा राज्य ‘कॅसिनो कॅपिटल’ (Casino) म्हणून प्रमोट केले जाईल, असे केंद्रीय पर्यटन आणि संस्कृती मंत्री जी. किशन रेड्डी यांनी काही वर्षांपूर्वी गोव्यात सांगितले होते.

कॅसिनोमध्ये सर्व प्रकारच्या आलिशान अश्या सोयी-सुविधा ग्राहकांना उपलब्ध करून दिल्या जातात. साहजिकच कसिनोमध्ये जुगार खेळण्यासाठी गोव्यात येणारे बहुतेक लोक उच्चभ्रू फॅमिलीतील असतात.

त्यामुळे ते पणजीत आल्यावर राहण्यासाठी येथील हॉटेल्स बुक करतात. अर्थात त्यामुळे पणजी शहराला लागून वाहणाऱ्या मांडवी नदीतील या कॅसिनोमुळे पणजी आणि लगतच्या भागातील हॉटेल व्यवसाय चांगलाच तेजीत आला आहे.

पणजीतील 1 BHK, 2 BHK तसेच AC - Non AC या प्रकारातील या हॉटेल्स मधील रूम्सचे दर एक हजारापासून ते अगदी तीन हजारांपर्यंत आहेत.

तसेच रूममध्ये राहणाऱ्यांची संख्या, बुक केलेल्या रूम्सची संख्या आणि दिवसांच्या संख्येनुसार रूम्सचे दर बदलत असल्याचे येथील हॉटेल्स व्यवस्थापनाकडून सांगण्यात आलेय.

कॅसिनोमुळे फक्त हॉटेल्स मालकांचा धंदा तेजीत होतो असं नाही तर हॉटेल्समध्ये काम करणाऱ्या कर्मचाऱ्यांना देखील आर्थिक लाभ होतोय.

पर्यटकांनी भाड्याने घेतलेल्या वाहनांमधून, बोट क्रूझसाठी खरेदी केलेल्या तिकिटांमधून आणि इतर अनेक गोष्टींमधून या हॉटेल्सच्या स्टाफ मेम्बर्सना कमिशन मिळते.

तसेच पर्यटकांना हॉटेल्समध्ये आणणाऱ्यांना 20 टक्के रनिंग कमिशन देत असल्याचे हॉटेल मालकांकडून सांगण्यात आले. थोडक्यात मांडवी नदीवरील या ऑफशोअर कॅसिनोमुळे गोव्यातील हॉटेल्सचा धंदा तेजीत आहे.